پرەزيدەنت قاسىم-جومارت توقايەۆتىڭ توراعالىعىمەن شۇعىل ارەكەت ەتۋ شتابىنىڭ كەزەكتى وتىرىسى ءوتتى. جيىن بارىسىندا باس پروكۋرور، ۇلتتىق قاۋىپسىزدىك كوميتەتىنىڭ ءتوراعاسى جانە ىشكى ىستەر ءمينيسترىنىڭ مىندەتىن اتقارۋشى تۇلعا بايانداما جاسادى، دەپ حابارلايدى اlmaty-akshamy.kz akorda.kz سىلتەمە جاساپ.
مەملەكەت باسشىسىنا قۇقىق قورعاۋ ورگاندارى مەن قارۋلى كۇشتەردىڭ ەلىمىزدەگى قۇقىقتىق ءتارتىپ پەن زاڭدىلىقتى قالپىنا كەلتىرۋىنە قاتىستى قابىلدانعان شارالار مەن وڭىرلەردەگى توتەنشە جاعداي رەجيمىنىڭ ساقتالۋىن قامتاماسىز ەتۋ جۇمىستارى تۋرالى باياندالدى. بلوك بەكەتتەر ورناتىلىپ، ۇقشۇ-عا مۇشە مەملەكەتتەردىڭ بىرىككەن بىتىمگەرلىك كۇشتەرىنە ءبىرقاتار ستراتەگيالىق نىساندى كۇزەتۋ تاپسىرىلدى. كۇشتىك قۇرىلىمدار ەلدى مەكەندەردە «تازالاۋ» جۇمىستارىن جالعاستىرىپ جاتىر. لاڭكەستەردىڭ ورنالاسقان جەرىن انىقتاۋ، ۇستاۋ، ولارعا قاتىستى قۇجاتتار مەن مالىمەتتەردى جيناۋ جانە ءتيىستى ساراپتاما جاساۋ جونىندە شۇعىل شارالار اتقارىلۋدا.
ءقازىر 125 قىلمىستىق ءىس قوزعالعان. پوليسيا ورگاندارىنا 5،8 مىڭ ادام جەتكىزىلگەن. ولاردىڭ اراسىندا كوپتەگەن شەتەلدىك ازاماتتار دا بار.
جيىندا ەلىمىزدىڭ بارلىق وڭىرلەرىندە احۋالدىڭ تۇراقتانعانى، جاعدايدىڭ باقىلاۋعا الىنعانى جانە قۇقىق قورعاۋ ورگاندارى اكىمشىلىك عيماراتتاردىڭ ءبارىن لاڭكەستەردەن تازارتقانى تۋرالى ايتىلدى. كوممۋنالدىق جانە تىرشىلىككە قاجەتتى باسقا دا نىساندار قالپىنا كەلتىرىلىپ جاتىر.
قاسىم-جومارت توقايەۆ كۇشتىك قۇرىلىمداردىڭ ەلىمىزدەگى قوعامدىق ءتارتىپ پەن قاۋىپسىزدىكتى تولىق قالپىنا كەلتىرۋ ءۇشىن بارلىق قاجەتتى شارالاردى قابىلدايتىنىن اتاپ ءوتتى.
وتىرىس بارىسىندا مەملەكەت باسشىسى تارتىپسىزدىكتەردىڭ سالدارىنان كەلگەن شىعىنداردى قالپىنا كەلتىرۋ ءۇشىن ۇكىمەتتىك كوميسسيا قۇرۋدى تاپسىردى.
پرەزيدەنت الماتى قالاسى مەن باسقا دا وڭىرلەردىڭ اكىمشىلىك عيماراتتارىن، الەۋمەتتىك جانە كوممۋنالدىق نىساندارىن قالپىنا كەلتىرۋ جۇمىستارىنا جەدەل كىرىسۋدى تاپسىردى.