قاسىم-جومارت توقايەۆ ق ر پرەزيدەنتى ءىس باسقارماسىنىڭ مەديسينالىق ورتالىعىنا قاراستى سانيتاريالىق-ەپيدەميولوگيالىق ساراپتاما ورتالىعىنىڭ بيىل پايدالانۋعا بەرىلگەن جاڭا عيماراتىن ارالاپ كوردى.
سانيتاريالىق-ەپيدەميولوگيالىق ساراپتاما ورتالىعىندا قورشاعان ورتا وبەكتىلەرىنە جانە تاماق ونىمدەرىنە باكتەريولوگيالىق، مولەكۋليارلىق-گەنەتيكالىق، پارازيتولوگيالىق، سانيتاريالىق-حيميالىق جانە توكسيكولوگيالىق، راديولوگيالىق زەرتتەۋ جۇمىستارى جۇرگىزىلەدى، دەپ حابارلايدى اlmaty-akshamy.kz.
مەملەكەت باسشىسىنا ورتالىقتاعى زاماناۋي قۇرالدارمەن جابدىقتالعان جانە ەڭ جاڭا ادىستەمەلەردى پايدالانا وتىرىپ، جەدەل ءارى ناقتى ناتيجەلەردى الۋعا مۇمكىندىك بەرەتىن زەرتحانالار تانىستىرىلدى. وندا زاماناۋي اناليزاتورلارمەن بىرگە اگرەسسيۆتى-حيميالىق رەاكتيۆتەردى قاجەت ەتپەيتىن، ەكسپرەسس-ادىستەمەلەردى قولداناتىن ءپورتاتيۆتى زەرتحانالىق قۇرىلعىلار ورناتىلعان. بۇل زەرتتەۋ ۋاقىتىن ەداۋىر قىسقارتىپ قانا قويماي، قارجىنى دا ۇنەمدەيدى.
قازاقستان رەسپۋبليكاسى پرەزيدەنتىنىڭ ءىس باسقارماسى مەديسينالىق ورتالىعىنىڭ باسشىسى الەكسەي سويدىڭ ايتۋىنشا، سانيتاريالىق-ەپيدەميالىق ساراپتاما ورتالىعىندا 8 زەرتحانا جۇمىس ىستەيدى. الداعى ۋاقىتتا زەرتتەۋلەر نومەنكلاتۋراسىن جىلىنا 2000-عا دەيىن كەڭەيتۋ كوزدەلىپ وتىر.
سونىمەن قاتار زەرتتەۋلەردىڭ جاڭا تۇرلەرىن، حالىقارالىق ساپا جانە قۇزىرەتتىلىك ستاندارتتارىن ەنگىزۋ ناتيجەسىندە ورتالىق رەفەرەنس زەرتحانا مارتەبەسىنە يە بولا الادى. ياعني، باسقا زەرتحانالارداعى كۇمان تۋدىرعان زەرتتەۋلەردىڭ دۇرىستىعى مەن دالدىگىن وسى جەردە ناقتى تەكسەرۋگە بولادى.
قاسىم-جومارت توقايەۆ ءوز مىندەتتەرىن ۇلكەن جاۋاپكەرشىلىكپەن اتقارىپ جۇرگەن ماماندارعا العىس ايتىپ، جاڭا ساراپتاما ورتالىعى ەل يگىلىگىنە قىزمەت ەتەتىنىنە سەنىم ءبىلدىردى.
مەملەكەت باسشىسى مەديسينالىق ورتالىقتىڭ قوعامدىق دەنساۋلىق ساقتاۋ ىسىنە قوسقان ۇلەسى مەن ستراتەگيالىق ماڭىزى زور ەكەنىن اتاپ ءوتتى.