پرەزيدەنتكە «سامۇرىق-قازىنا» اكسيونەرلىك قوعامىن رەفورمالاۋدىڭ ەكىنشى كەزەڭىنىڭ جۇزەگە اسىرىلىپ جاتقانى تۋرالى باياندالدى.
بۇل كەزەڭدە نەگىزىنەن پورتفەلدىك كومپانيالاردىڭ تيىمدىلىگىن ارتتىرۋعا، ولاردىڭ شىعىندارىن وڭتايلاندىرا وتىرىپ، نارىقتاعى قۇنىن ۇلعايتۋعا باسا ءمان بەرىلىپ وتىر. بيزنەستىڭ الەۋمەتتىك جاۋاپكەرشىلىگىن ارتتىرۋ دا اسا ماڭىزدى، دەپ حابارلايدى Almaty-akshamy.kz اقوردا سايتىنا سىلتەمە جاساپ.
الماسادام ساتقالييەۆ مەملەكەت باسشىسىنا قوردىڭ ستراتەگيالىق اكتيۆتەردەگى باقىلاۋشىلىق ۇلەسىن ساقتاي وتىرىپ، اكتيۆتەردى جەكەشەلەندىرۋ باعدارلاماسىن ىسكە اسىرۋدى جالعاستىراتىنىن ايتتى.
سونىمەن قاتار قاسىم-جومارت توقايەۆقا «سامۇرىق-قازىنا» اكسيونەرلىك قوعامىنىڭ گازبەن جانە سۋمەن قامتۋ، كولىك جانە ەنەرگەتيكا سالالارىنداعى ماڭىزدى جوبالارى جونىندە مالىمەت بەرىلدى. بۇل جوبالاردىڭ جۇزەگە اسىرىلۋى قازاقستان حالقىنىڭ ءومىر ءسۇرۋ ساپاسىن جاقسارتۋعا، جاڭا جۇمىس ورىندارىن اشۋعا سەپتىگىن تيگىزەدى. قور باسىمدىق بەرەتىن جوبالار ءتىزىمىن كەڭەيتۋدى جوسپارلاپ وتىر.
كەزدەسۋ قورىتىندىسى بويىنشا، پرەزيدەنت قورعا قاراستى كومپانيالار توبى قىزمەتىنىڭ تيىمدىلىگىن ارتتىرۋعا، سونىڭ ىشىندە جوبالاردى ىسكە اسىرۋدىڭ ناقتى مەرزىمدەرىنە جانە حالىق الدىنداعى اشىقتىقتى قامتاماسىز ەتۋگە بايلانىستى ءبىرقاتار ناقتى تاپسىرما بەردى.