مەملەكەت باسشىسى حالىققا ءوزىنىڭ بەينەۇندەۋىن جولدادى.
پرەزيدەنت بۇل حالىقتىڭ كوپ جىلعى تالاپ-تىلەگىنەن تۋىنداپ وتىرعانىن ايتتى، دەپ حابارلايدى Almaty-akshamy.kz ق ر پرەزيدەنتىنىڭ تەلەراديوكەشەنىنە سىلتەمە جاساپ.
"ازاماتتارىمىز مەملەكەتتى باسقارۋ ىسىنە قاتىسۋعا كەڭ مۇمكىندىك بەرىلگەنىن قالايدى. سونداي-اق ساياسي ۇدەرىستى تۇبەگەيلى دەموكراتيالاندىرۋ قاجەت دەپ سانايدى. مۇنى ءتيىمدى جۇزەگە اسىرۋ ءۇشىن اتا زاڭىمىزعا وزگەرىستەر ەنگىزۋ قاجەت.
ءبىر سوزبەن ايتقاندا، كونستيتۋسيالىق رەفورما جاساۋ كەرەك. وسىعان وراي مەنىڭ تاپسىرماممەن ارناۋلى جۇمىس توبى قۇرىلدى. وعان بەلگىلى قۇقىقتانۋشى عالىمدار، تاجىريبەلى ساراپشىلار جانە قۇزىرلى ورگانداردىڭ وكىلدەرى كىردى"، - دەدى پرەزيدەنت قاسىم-جومارت توقايەۆ.
جۇمىس توبى نەگىزگى زاڭعا ەنگىزىلەتىن وزگەرىستەر مەن تولىقتىرۋلاردىڭ جوباسىن ازىرلەدى. ول مۇقيات زەردەلەپ، كونستيتۋسيالىق كەڭەسكە جولداندى.
"بۇل ورگان ءوز قورىتىندىسىن ۇسىندى. قۇجات جوباسى اتا زاڭ نورمالارىنا ساي كەلەدى. ءبىز كونستيتۋسيالىق رەفورمانىڭ شەشۋشى كەزەڭىنە قادام باستىق. ەندى نەگىزگى زاڭدى وزگەرتۋىمىز كەرەك. شىن مانىندە، مۇنىڭ ەل تاعدىرى ءۇشىن ايرىقشا ءمانى بار.
اتا زاڭ باپتارىنىڭ ۇشتەن ءبىرى وزگەرەدى. اشىعىن ايتساق، كونستيتۋسيامىز مۇلدە جاڭا سيپاتقا يە بولادى. سول سەبەپتى، مەن رەسپۋبليكالىق رەفەرەندۋم وتكىزۋ تۋرالى باستاما كوتەردىم. ويتكەنى، مۇنداي اۋقىمدى وزگەرىس بۇكىل حالىقتىڭ شەشىمىمەن جۇزەگە اسىرىلۋعا ءتيىس"، - دەدى مەملەكەت باسشىسى.