پرەزيدەنت ءبىرقاتار تاپسىرما بەردى.
مەملەكەت باسشىسى قاسىم-جومارت توقايەۆ پرەمەر-مينيستردىڭ ءبىرىنشى ورىنباسارى رومان سكليار مەن نۇر-سۇلتان قالاسىنىڭ اكىمى التاي كولگىنوۆتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
قاسىم-جومارت توقايەۆقا ەلوردانىڭ الەۋمەتتىك-ەكونوميكالىق جانە ينفراقۇرىلىمدىق دامۋى جونىندە مالىمەت بەرىلدى.
پرەزيدەنتكە الەۋمەتتىك نىسانداردىڭ قۇرىلىسى، گازبەن قامتۋ ءىسى، ۇلەسكەرلىك قۇرىلىس نىساندارىنىڭ اياقتالۋى جانە ينۆەستيسيا تارتۋ ماسەلەلەرى تۋرالى باياندالدى.
مەملەكەت باسشىسى الەۋمەتتىك نىساندار قۇرىلىسىنىڭ كولەمىن ۇلعايتۋ، توزىعى جەتكەن ەسكى تۇرعىن ۇيلەردى ءسۇرۋ جانە جاڭا تۇرعىن ءۇي الاپتارىن دامىتۋ قاجەت ەكەنىنە نازار اۋداردى. جۇمىس ورىندارىن اشۋ جانە جاستاردى قولداۋ ماسەلەسى باسىم مىندەتتەردىڭ ءبىرى رەتىندە اتاپ ءوتىلدى.
بيىل 10 مىڭ الەۋمەتتىك پاتەر سالىنادى. سوڭعى ءۇش جىلدا بۇل كورسەتكىش 3 ەسەدەن استام ارتقان. بيىل تاعى دا 40 كوپ پاتەرلى تۇرعىن ءۇي كەشەنىنىڭ قۇرىلىسى اياقتالادى جانە كەمىندە 16 مەكتەپ سالىنادى.
سونىمەن قاتار كەزدەسۋ بارىسىندا قاسىم-جومارت توقايەۆقا قالاداعى ەپيدەميولوگيالىق احۋالدى تۇراقتاندىرۋعا جانە ۆاكسينالاۋعا باعىتتالعان شارالار تۋرالى باياندالدى. پرەزيدەنت ەلوردانى ودان ءارى دامىتۋ جونىندە ءبىرقاتار تاپسىرما بەردى.