مەملەكەت باسشىسى «قازاقتەلەكوم» اق باسقارما ءتوراعاسى قۋانىشبەك ەسەكەيەۆتى قابىلدادى، دەپ حابارلايدى اlmaty-akshamy.kz اقورداعا سىلتەمە جاساپ.
پرەزيدەنتكە «قازاقتەلەكوم» اق كومپانيالار توبىنىڭ 2022 جىلى قول جەتكىزگەن نەگىزگى قارجى-ەكونوميكالىق كورسەتكىشتەرى مەن جۇزەگە اسىرۋعا جوسپارلاعان پەرسپەكتيۆتى جوبالارى تۋرالى مالىمەت بەرىلدى.
قۋانىشبەك ەسەكەيەۆتىڭ ايتۋىنشا، وتكەن جىلى «قازاقتەلەكوم» اق-نىڭ نەگىزگى قارجى جانە ەكونوميكالىق كورسەتكىشتەرى ءوستى. بۇل بيىل ءبىرقاتار اۋقىمدى جوبانى ىسكە اسىرۋعا مۇمكىندىك بەرەدى. ولاردىڭ نەگىزگىسى 5G جەلىسىن جۇرگىزۋ جوباسى بولماق. اتالعان مىندەتتى «متس» ج ش س جانە «كسەلل» اق وپەراتورلارىنىڭ كونسورسيۋمى اتقارادى. «قازاقتەلەكوم» اكسيونەرلىك قوعامىنىڭ ەنشىلەس كومپانيالارى 2027 جىلعا دەيىن ەلىمىز بويىنشا 7 مىڭنان استام بازالىق ستانسيا سالۋعا ءتيىس. بيىل استانا، الماتى جانە شىمكەنت قالالارىندا وسىنداي 486 ستانسيا پايدالانۋعا بەرىلەدى. قاسىم-جومارت توقايەۆقا «ازەربايجان – قازاقستان» باعىتى بويىنشا كاسپيي تەڭىزىنىڭ تابانى ارقىلى تارتىلاتىن تالشىقتى-وپتيكالىق بايلانىس جەلىسىنىڭ قۇرىلىسىنا قاتىستى حالىقارالىق جوبانى «AzerTelecom» كومپانياسىمەن بىرلەسىپ جۇزەگە اسىرۋ جۇمىستارى جالعاساتىنى جونىندە باياندالدى. سونىمەن قاتار بيىل اۋىلداردى ودان ءارى ينتەرنەتپەن قامتاماسىز ەتۋ، قازاقستان ابونەنتتەرىن ەسكىرگەن ADSL جەلىلەرىنەن وپتيكاعا كوشىرۋ، كوپقاباتتى تۇرعىن ۇيلەردى GPON تەحنولوگياسى ارقىلى جىلدامدىعى جوعارى ينتەرنەتكە قوسۋ سەكىلدى جوبالار ىسكە اسىرىلادى.
كەزدەسۋ سوڭىندا پرەزيدەنت حالقىمىز بەن ەكونوميكامىز ءۇشىن جوسپارلانعان جوبالاردى ۋاقىتىلى جانە ساپالى ورىنداۋدىڭ ماڭىزدىلىعىنا نازار اۋداردى. بۇدان بولەك، مەملەكەت باسشىسى قالالار مەن اۋىلدىق جەرلەردەگى تەلەكوممۋنيكاسيا جەلىلەرىن ودان ءارى دامىتۋ، سونداي-اق قازاقستاننىڭ ترانزيتتىك الەۋەتىن ارتتىرۋ ءۇشىن حالىقارالىق دەرەكتەر ترافيگىندە جەلىلىك ينفراقۇرىلىمدى وركەندەتۋ جونىندە ءبىرقاتار ناقتى تاپسىرما بەردى.