قحر ءتوراعاسىنىڭ ورىنباسارى ۆان سيشانمەن اڭگىمەلەسۋ بارىسىندا مەملەكەت باسشىسى قىتايدىڭ اوسشك سامميتىنە وسىنداي جوعارى دەڭگەيدە قاتىسۋى ءبىزدىڭ وراسان زور كونتينەنتتە بەيبىتشىلىكتى، تۇراقتىلىق پەن قاۋىپسىزدىكتى ساقتاۋ جولىنداعى ءوزارا سەنىمگە نەگىزدەلگەن سەرىكتەستىكتى نىعايتۋعا ەلەۋلى ۇلەس قوساتىنىن اتاپ ءوتتى، دەپ حابارلايدى اlmaty-akshamy.kz.
قاسىم-جومارت توقايەۆ كەڭەستى تولىققاندى حالىقارالىق ۇيىمعا اينالدىرۋ جونىندەگى قازاقستاننىڭ باستاماسىن قولداعانى ءۇشىن جۇڭگو تاراپىنا ريزاشىلىعىن ءبىلدىردى.
كەزدەسۋدە ءتوراعا سي ءسزينپيننىڭ وتكەن ايدا قازاقستانعا جاساعان مەملەكەتتىك ساپارىنىڭ قورىتىندىسى بويىنشا قول جەتكىزىلگەن ۋاعدالاستىقتاردىڭ جۇزەگە اسىرىلۋ بارىسى تالقىلاندى.
ءوز كەزەگىندە ۆان سيشان قاسىم-جومارت توقايەۆقا قحر ءتوراعاسى سي ءسزينپيننىڭ سالەمىن جەتكىزدى جانە جۇڭگو مەن قازاقستاننىڭ ساۋدا-ەكونوميكالىق، ينۆەستيسيالىق، كولىك-لوگيستيكالىق، مادەني-گۋمانيتارلىق سالالارداعى، ونەركاسىپ كووپەراسياسى مەن سيفرلاندىرۋ باعىتىنداعى ەكىجاقتى قاتىناستارى قارقىندى دامىپ كەلە جاتقانىن اتاپ ءوتتى.
ۆان سيشان ەكى ەل اراسىنداعى قارىم-قاتىناس ماڭگىلىك دوستىق پەن ءوزارا سەنىم رۋحىندا دامىپ كەلە جاتقانىن ايتتى. جۇڭگو دەلەگاسياسى باسشىسىنىڭ ايتۋىنشا، سي ءسزينپيننىڭ قازاقستانعا ساپارى بارىسىندا قول جەتكىزىلگەن ۋاعدالاستىقتار ءساتتى جۇزەگە اسىپ كەلەدى.
سونىمەن قاتار ولار وڭىرلىك جانە جاھاندىق كۇن تارتىبىندەگى وزەكتى ماسەلەلەر جونىندە پىكىر الماستى.