قوعامدىق قاۋىپسىزدىكتى ارتتىرۋ
بۇگىن الماتى اكىمى ەربولات دوسايەۆ اۋەزوۆ اۋدانى جۇرتشىلىعىمەن كەزدەستى، دەپ حابارلايدى Almaty-akshamy.kz.
اۋدان حالقىمەن كەزدەسۋدە شاھار باسشىسى قوعامدىق قاۋىپسىزدىك ماسەلەسىنە، اسىرەسە، اۋەزوۆ اۋدانىنداعى جول قاۋىپسىزدىگىنە جەكە توقتالىپ ءوتتى.
اعىمداعى جىلدىڭ 9 ايىنىڭ قورىتىندىسى بويىنشا، قالادا تىركەلگەن جول-كولىك وقيعالارى كولەمىندەگى اۋداننىڭ ۇلەسى 14%ء-تى قۇرادى. 2620 جول-كولىك وقيعاسىنىڭ 375ء-ى وسى اۋداندا تىركەلگەن.
«ازاماتتار وتىنىشتەرىنە جۇرگىزىلگەن تالداۋدى ەسكەرە وتىرىپ، مۇحامەدجانوۆ پەن فۋركات كوشەلەرىندەگى كولىك قۇرالدارى قوزعالىسىنىڭ قارقىنىن رەتتەۋ شارالارى قابىلداندى»، - دەدى قالا اكىمى.
اۆتوموبيلدەردىڭ جىلدامدىعىن تومەندەتۋ ماقساتىندا مۇحامەدجانوۆ پەن يسايەۆ كوشەلەرى قيىلىسىنا 2 جاساندى جول كەدەرگىسى جانە 4 جول بەلگىسى ورناتىلدى.
فۋركات كوشەسىنىڭ بويىنا تولە بي-شىمبۇلاتوۆ ۋچاسكەسىندە جول بەلگىلەرى قويىلىپ، «توقتاۋعا تىيىم سالىنعان» بەلگىسى ورناتىلدى.
جاياۋ جۇرگىنشىلەر قاۋىپسىزدىگىن قامتاماسىز ەتۋ ماقساتىندا جىل باسىنان بەرى جاندوسوۆ (3)، مومىش ۇلى، شالياپين، التىنسارين ، وتەگەن باتىر، سۇلەيمەنوۆ كوشەلەرىنىڭ بويىنا 9 جاڭا باعدارشام ورناتىلدى.
31 قازانعا دەيىن سۇلەيمەنوۆ، جاندوسوۆ، شالياپين كوشەلەرىنىڭ بويىنا تاعى 5 باعدارشام ورناتۋ جانە ىسكە قوسۋ جۇمىستارى اياقتالادى.
«زاڭ بۇزۋشىلىقتىڭ الدىن الۋ ماقساتىندا بۇگىندە قوعامدىق ورىنداردا 168 بەينەباقىلاۋ كامەراسى جۇمىس ىستەيدى.
بەينەمونيتورينگ جۇيەلەرى جەلىسىن كەڭەيتۋ ءۇشىن، قازان ايىندا ادامدار كوپ جينالاتىن ورىندارعا قوسىمشا 359 كامەرا، ونىڭ ىشىندە كوپ پاتەرلى تۇرعىن ۇيلەردىڭ اۋلالارىنا 275 كامەرا، مەكتەپتەر مەن كوللەدجدەردىڭ جانىنا 42، جول قيىلىستارىنا 24، الاڭدار مەن مەشىتتەرگە 12، پاركتەر مەن سكۆەرلەرگە 6 كامەرا ورناتۋ باستالدى. 2022 جىلدىڭ سوڭىنا دەيىن بارلىق كامەرالار ورناتىلادى»، - دەدى الماتى اكىمى ەربولات دوسايەۆ.
كولىك قۇرالدارىن جۇرگىزۋ ءتارتىبىن جاقسارتۋ ءۇشىن، بۇگىندە 65 «سەرگەك» اپپاراتتىق-باعدارلامالىق كەشەنى (526 كامەرا) جۇمىس ىستەيدى.
2023 جىلدىڭ I توقسانىندا اۋدان كوشەلەرىن 75 «سەرگەكپەن» قوسىمشا جابدىقتاۋ جوسپارلانۋدا.