تورەعالي تورەالى الەۋمەتتىك جەلىدە ءوزىنىڭ كوشە سىپىرىپ جۇرگەن ۆيدەوسىن جاريالادى
پوليسەيلەردى بالاعاتتاعانى ءۇشىن 40 ساعاتتىق قوعامدىق جۇمىسقا تارتىلعان بەلگىلى ءانشى تورەعالي تورەالى الەۋمەتتىك جەلىدە ءوزىنىڭ كوشە سىپىرىپ جۇرگەن ۆيدەوسىن جاريالاپ، سوت ۇكىمىن ورىنداپ جۇرگەنىن ايتتى.
«سوتتىڭ شەشىمى بويىنشا، 40 ساعاتتىق قوعامدىق جۇمىس تاپسىرعان بولاتىن. تۇسكە دەيىن ساياباقتا بولدىق. ەندى وسى جەردى تازالاپ جاتىرمىز. بۇل مەنىڭ تاۋەلسىز وتانىم، تاۋەلسىز ەلىم، تاۋەلسىز جەرىم، تاۋەلسىز قازاقستانىم. البەتتە، ءانۇرانى، كوك تۋى بار ەلدىڭ مىندەتتى تۇردە زاڭى بولادى. ول زاڭنىڭ الدىندا بارلىعىمىز بىردەيمىز. وعان باعىنۋىمىز كەرەك. مىنە، ۇلى دالا بالاسى ۇلى دالانى سىپىرىپ جاتىر. مۇنىڭ ەش ابەستىگى جوق. كەرىسىنشە، تازالىق ساقتاۋ – سۇننەت. ءوز جاتقان-تۇرعان جەرىڭدى تازا ۇستاۋ، ەرتەڭ اس ىشەتىن ىدىسىڭدى بۇگىن جۋىپ قويۋ دەگەن تازالىق. ال تازالىق يماننان ەمەس پە؟»، - دەيدى ءانشى بەينەجازبادا.