كومىر جاعاتىن ەلەكتر ستانسيالارى مەن قازاندىقتار ەكولوگيالىق احۋالدىڭ ناشارلاۋىنا اكەپ سوقتىردى
مەملەكەت باسشىسى قاسىم-جومارت توقايەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ وتىرىسى ءوتتى. جيىندا ەكولوگيا جانە سۋ قاۋىپسىزدىگى ماسەلەلەرى قاراستىرىلدى، دەپ حابارلايدى Almaty-akshamy.kz.
ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا ەكولوگيالىق قاۋىپسىزدىكتىڭ جاي-كۇيى جونىندە بايانداما جاسادى. سونداي-اق ءبىرقاتار مەملەكەتتىك ورگان باسشىلارى مەن ءوڭىر اكىمدەرى جەكەلەگەن ماسەلەلەر بويىنشا ەسەپ بەردى، دەلىنگەن اقوردا حابارلاماسىندا.
پرەزيدەنت وتىرىس بارىسىندا ەكولوگيالىق قاۋىپسىزدىككە قاتەر توندىرەتىن تابيعي جانە انتروپوگەندىك فاكتورلارعا قارسى كۇرەس اسا ماڭىزدى ەكەنىن اتاپ ءوتتى.
"سوڭعى جىلدارى كوپتەگەن ەلدىڭ ۇكىمەتتەرىنىڭ بەلسەندىلىگى ارتتى. ەكولوگيانى جاقسارتۋ، «جاسىل» ەكونوميكاعا كوشۋ جانە كومىرسۋتەگى بەيتاراپتىعىنا قول جەتكىزۋ ءۇشىن باتىل شەشىمدەر قابىلدانىپ جاتىر. ۇرپاعىمىزدىڭ دەنى ساۋ بولىپ، اۋاسى تازا ەلدە ءومىر سۇرگىمىز كەلسە جانە مەملەكەتىمىزدى بۇكىل الەم مويىنداعانىن قالاساق، ءبىز ولاردان ۇلگى الۋىمىز كەرەك"، - دەدى قاسىم-جومارت توقايەۆ.
مەملەكەت باسشىسى ەكولوگيا سالاسىندا شۇعىل شەشىم قابىلداۋدى قاجەت ەتەتىن پروبلەمالارعا باسا نازار اۋداردى.
"كەڭەس كەزەڭىنەن كەلە جاتقان كوپتەگەن ءوندىرىس ورنى، كومىر جاعاتىن ەلەكتر ستانسيالارى مەن قازاندىقتار ەكولوگيالىق احۋالدىڭ ناشارلاۋىنا اكەپ سوقتىردى"، – دەدى پرەزيدەنت.
بۇدان بولەك، جيىندا قورشاعان ورتانى قورعاۋعا ۇلكەن جاۋاپكەرشىلىكپەن قاراۋ جونىندە ءبىرقاتار ماسەلە كوتەرىلدى.