قۇرمەتتى پارتيالاستار!
ەڭ الدىمەن، بارشاڭىزدى بۇگىنگى العىس ايتۋ كۇنىمەن قۇتتىقتايمىن!
بۇل – ءوزارا تىلەكتەستىكتى، جاناشىرلىقتى، قامقورلىقتى دارىپتەيتىن مەيرام. ءبىز وسىنداي ىنتىماقتىڭ ارقاسىندا قاڭتارداعى قيىن-قىستاۋ كۇندەردە مەملەكەتتىگىمىز بەن تۇتاستىعىمىزدى قورعاپ قالدىق. سىن ساعاتتا بىرلىگىن ساقتاي بىلگەن بارشا وتانداستارىمىزعا زور ريزاشىلىق بىلدىرەمىن. ۇيىمدى جاڭعىرتۋ تۋرالى القالى جيىننىڭ ءدال بۇگىن ءوتۋىنىڭ سيمۆولدىق ءمانى بار.
ءبىرىنشى ناۋرىز – پارتيانىڭ قۇرىلعان كۇنى. 23 جىل بۇرىن ەلىمىزدەگى ەڭ باستى ساياسي ۇيىمنىڭ نەگىزى قالاندى. پارتيا حالىقتى ورتاق ماقساتقا جۇمىلدىردى. قوعامعا پايدالى كوپتەگەن باستامالار كوتەرىپ، سايلاۋشىلاردىڭ قولداۋىنا يە بولدى.
ءقازىر بۇكىل الەمدەگى احۋال وزگەرىپ جاتىر. جاڭا قۇندىلىقتارمەن قاتار كۇردەلى سىن-قاتەرلەر پايدا بولۋدا. وسىنداي اۋمالى-توكپەلى ۋاقىتتا ەلىمىز دامۋدىڭ كەلەسى كەزەڭىنە قادام باستى. ءبىز «جاڭا قازاقستاندى» قۇرۋعا كىرىستىك. بۇل – وتە اۋقىمدى مىندەت. ءتىپتى، بولاشاقتاعى تاعدىرىمىزدى شەشەتىن اسا ماڭىزدى جۇمىس دەۋگە بولادى. ونى ويداعىداي جۇزەگە اسىرۋ ءۇشىن جاڭا ماقسات-مىندەتتەرىمىزدى ايقىنداپ الۋىمىز قاجەت.
پارتيا بارلىق رەفورماعا ۇيىتقى بولۋعا ءتيىس. ول ءۇشىن وزگەرىستى الدىمەن وزىمىزدەن باستاۋىمىز كەرەك. سوندىقتان بۇگىنگى كۇن تارتىبىندەگى نەگىزگى ماسەلە – پارتيانى جاڭعىرتۋ.
زامان، قوعام، ادام وزگەرىپ جاتقاندا، پارتيانىڭ وزگەرۋى – زاڭدىلىق. بۇل – ۋاقىت تالابى. وسىعان وراي جاڭا عانا ايتىلعانداي، ساياسي ۇيىمنىڭ اتاۋىن امانات دەپ وزگەرتۋ ۇسىنىلدى. جاسىراتىن ەشتەڭە جوق، مەن دە بۇل ماسەلەگە بايلانىستى پىكىرتالاسقا قاتىستىم. بىرنەشە ۇسىنىس بولدى، سونىڭ ىشىنەن امانات دەگەن اتاۋعا توقتادىق. بۇل – ەلىمىز ءۇشىن دە، ۇلتىمىز ءۇشىن دە ايرىقشا ءمانى بار كيەلى ۇعىم.
ەگەمەندىگىمىز، ەلدىگىمىز بەن بىرلىگىمىز، كەڭ بايتاق جەرىمىز – بىزگە بابالاردان جەتكەن امانات. وسى قاستەرلى قۇندىلىقتارىمىزدى كوزدىڭ قاراشىعىنداي ساقتاپ، بولاشاققا ميراس ەتۋىمىز كەرەك. مەملەكەتتىلىك ءداستۇر جالعاستىعى، ۇرپاق ساباقتاستىعى دەگەنىمىز – مىنە وسى. حالقىمىز ەشقاشان اماناتقا قيانات جاساماعان. پارتيا بۇل قاعيداتتى بەرىك ۇستانادى.
سوندىقتان مەن پارتيامىزدى رەسمي تۇردە امانات دەپ اتاۋدى تولىق قولدايمىن.
مەن 16 ناۋرىزدا ساياسي رەفورمالاردىڭ جاڭا باعدارلاماسىن ۇسىنامىن. ءقازىر پارتيالار اراسىندا باسەكە كۇشەيە تۇسۋدە. وسى ورايدا ءبىز پارتيامىزدىڭ باستى ساياسي كۇش رەتىندەگى ءرولىن ساقتاۋىمىز قاجەت. بۇل – وتە ماڭىزدى مىندەت. باسقاشا ايتقاندا، ۇيىم ءاردايىم ەل مۇددەسىن قورعايتىن ناعىز حالىقتىق پارتيا بولىپ قالۋى كەرەك.
دامۋدىڭ جاڭا كەزەڭىندە پارتياعا جاڭا تۇعىرناما قاجەت. ءبىراق، نەگىزگى قۇندىلىقتارىمىز وزگەرمەۋگە ءتيىس. ورتالىق اپپاراتقا جۇمىس توبىن قۇرىپ، پارتيانىڭ جاڭا تۇعىرناماسىن ازىرلەۋدى تاپسىرامىن. ونى پارتيا ىشىندە مۇقيات تالقىلاپ، كەلەسى سەزدە بەكىتەمىز.
وسى ورايدا، پارتيا ءوز جۇمىسىن جانداندىرىپ، ۇيىمنىڭ ءرولىن كۇشەيتە تۇسكەنى ءجون.
جىلدار بويى ءۇنسىز بولعان، ساياساتپەن اينالىسىپ جۇرگەن كەيبىر ادامدار قازىرگى «جىلىمىقتى» پايدالانىپ، الەۋمەتتىك جەلىگە جاپپاي شىعا باستادى. ولار اقپاراتتىق كەڭىستىكتى جايلاپ الدى دەۋگە بولادى. نەشە ءتۇرلى قاۋەسەتتەر، جالعان اقپارات تاراپ جاتىر. مۇنداي احۋال ەلدى اداستىرۋى مۇمكىن. اشىعىن ايتساق، ءبىزدىڭ جوسپارلارىمىزدى، قولعا الىپ جاتقان ءىس-شارالارىمىزدى كوپشىلىك بىلە بەرمەيدى. پارتيا بەلسەندىلەرى زاماناۋي اقپارات قۇرالدارىن پايدالانىپ، ساياساتىمىزدى جۇرتقا جان-جاقتى ءتۇسىندىرۋى قاجەت.
مەن ءۇشىن ەڭ باستى قۇندىلىق – قازاقستاننىڭ تاۋەلسىزدىگى. مەملەكەت باسشىسى رەتىندە ەلىمىزدىڭ قاۋىپسىزدىگى مەن حالقىمىزدىڭ اماندىعىن قامتاماسىز ەتۋ ءۇشىن قولدان كەلگەننىڭ ءبارىن جاسايمىن. جاۋاپكەرشىلىك جۇگى قانشاما اۋىر بولسا دا، ودان ەش قايمىقپايمىن.
بۇگىن پارتيامىزدىڭ باعىت-باعدارىن ايقىندادىق. ەندى بىلەك سىبانا جۇمىس ىستەۋىمىز كەرەك. حالىق ناقتى وزگەرىستەردى كۇتىپ وتىر.
پارتيا اتىنا زاتى ساي بولۋعا ءتيىس. ەل بىرلىگىن نىعايتىپ، جاڭا قازاقستاندى قۇرۋ – بارىمىزگە ورتاق مىندەت. وسى مىندەتتى ابىرويمەن اتقارساق، بولاشاعىمىز دا باياندى بولماق. پارتيانىڭ ءاربىر مۇشەسى بۇل جاۋاپكەرشىلىكتى تەرەڭ سەزىنىپ، ايانباي ەڭبەك ەتەدى دەپ سەنەمىن.
«بەرەكە باسى – بىرلىك» ەكەنىن ءاردايىم ەستە ساقتايىق! جاڭا قازاقستاندى بىرگە قۇرايىق!
ەلىمىز امان، جۇرتىمىز تىنىش بولسىن!
پارتيامىزدىڭ جاڭا اتاۋى قۇتتى بولسىن!