قۇقىقبۇزۋشىلىقتىڭ ۇشتەن ءبىرى پارا الۋ دەرەگىنە تيەسىلى.
اعىمداعى جىلدىڭ قاڭتار ايىندا ەلىمىزدە 169 سىبايلاس جەمقورلىق دەرەگى بويىنشا قۇقىقبۇزۋشىلىق تىركەلدى، بۇل ءبىر جىل بۇرىنعىدان 21%-عا از، دەپ حابارلايدى Almaty-akshamy.kz Finprom.kz-كە سىلتەمە جاساپ.
سالىستىرۋ ءۇشىن: 2021 جىلدىڭ وسى كەزەڭىندە وسىنداي 214 قۇقىقبۇزۋشىلىق تىركەلدى، بۇل جىلىنا مينۋس 35،2% دەگەن ءسوز.
قاڭتارداعى مۇنداي قۇقىقبۇزۋشىلىقتاردىڭ سانى 4 جىل قاتارىنان ازايىپ كەلەدى. 2022 جىلدىڭ قاڭتارىن 2018 جىلدىڭ قاڭتارىمەن سالىستىراتىن بولساق، زاڭ بۇزۋشىلىقتار سانى 6،7 ەسەگە ازايعان.
وڭىرلىك تۇرعىدان العاندا، سىبايلاس جەمقورلىققا بايلانىستى قىلمىستىق قۇقىقبۇزۋشىلىقتاردىڭ ەڭ كوبى الماتى قالاسىندا تىركەلدى: بارلىعى 23 جاعداي، بۇل جىلىنا 27،8%-عا ارتىق. «جەمقور» وبلىستاردىڭ ۇشتىگىنە ەلوردا (21 قۇقىق بۇزۋشىلىق، جىلىنا مينۋس 19،2%) مەن تۇركىستان وبلىسى (18 قۇقىق بۇزۋشىلىق، 2 ەسە ءوسىم) كىرەدى.
مۇنداي قۇقىقبۇزۋشىلىقتاردىڭ ەڭ ازى قىزىلوردا جانە اتىراۋ وبلىستارىندا تىركەلگەن، وبلىستاردىڭ ءارقايسىسىندا 3-اق وقيعا تىركەلگەن.
ەلىمىزدەگى بۇل قۇقىقبۇزۋشىلىقتاردىڭ باسىم بولىگى، ياعني 125 ءىس اۋىر قىلمىس ساناتىنا جاتقىزىلدى. تاعى 35 ءىس ورتاشا اۋىرلىقتاعى، 8 ءىس اۋىر ەمەس، 1 ءىس اسا اۋىر ساناتتاعى قىلمىستار ساناتىنا جاتقىزىلدى.
بارلىق قىلمىستىق سىبايلاس جەمقورلىق قۇقىقبۇزۋشىلىقتارىنىڭ 32،5%-ى پارا الۋ بولدى: 55 ءىس، جىلىنا مينۋس 12،7%. بۇدان كەيىنگى ورىندا پارا بەرۋ (48 ءىس، جىلىنا مينۋس 32،4%)، قىزمەتتىك وكىلەتتىگىن اسىرا پايدالانۋ (18 ءىس، پليۋس 63،6%)، بوتەننىڭ سەنىپ تاپسىرىلعان مۇلكىن يەمدەنۋ نەمەسە جىمقىرۋ (13 ءىس، مينۋس 45،8%) جانە بيلىكتى نەمەسە وكىلەتتىكتى اسىرا پايدالانۋ (13 جاعداي، مينۋس 7،1%) تۇر.
اعىمداعى جىلدىڭ قاڭتار ايىندا سىبايلاس جەمقورلىق فاكتىلەرى بويىنشا 77 ادام ۇستالدى، بۇل وتكەن جىلمەن سالىستىرعاندا 1،3%-عا ارتىق.
سىبايلاس جەمقورلىق قۇقىقبۇزۋشىلىقتارىن كوبىنەسە اكىمدىكتەر مەن ولاردىڭ قۇرىلىمدىق بولىمشەلەرىنىڭ قىزمەتكەرلەرى (7 ادام)، قازاقستان رەسپۋبليكاسى قارجى مونيتورينگى اگەنتتىگىنىڭ، دەنساۋلىق ساقتاۋ مينيسترلىگىنىڭ، يندۋستريا جانە ينفراقۇرىلىمدىق دامۋ مينيسترلىگىنىڭ قىزمەتكەرلەرى (ءارقايسىسىندا 2 ادامنان) جاساعان.
