كەزدەسۋدە ەكى ەل اراسىنداعى ساۋدا-ەكونوميكالىق جانە مادەني-گۋمانيتارلىق بايلانىستار تالقىلاندى
قازاقستان پرەزيدەنتى ازياداعى ءوزارا ءىس-قيمىل جانە سەنىم شارالارى جونىندەگى كەڭەسىنە (اوسشك) مۇشە مەملەكەتتەردىڭ سىرتقى ساياسي ۆەدومستۆو باسشىلارىنىڭ التىنشى كەڭەسىنە قاتىسۋ ءۇشىن نۇر-سۇلتان قالاسىنا كەلگەن رەسەي فەدەراسياسىنىڭ سىرتقى ىستەر ءمينيسترى سەرگەي لاۆروۆتى قابىلدادى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
كەزدەسۋ اياسىندا قازاقستان مەن رەسەي اراسىنداعى ەكىجاقتى ىنتىماقتاستىقتىڭ نەگىزگى اسپەكتىلەرى، اتاپ ايتقاندا ساۋدا-ەكونوميكالىق جانە مادەني-گۋمانيتارلىق بايلانىستار تالقىلاندى.
سونىمەن قاتار وڭىرلىك كۇن ءتارتىبى، اۋعانستانداعى جاعدايدى تۇراقتاندىرۋ باعىتىنداعى حالىقارالىق كۇشتى جۇمىلدىرۋ ماسەلەلەرى ءسوز بولدى. مەملەكەت باسشىسى قازاقستان تاراپىنان وسى ەلگە كورسەتىلىپ وتىرعان گۋمانيتارلىق كومەك شارالارى تۋرالى ايتتى.
قاسىم-جومارت توقايەۆ ازياداعى قاۋىپسىزدىك، جانجالداردىڭ الدىن الۋ جانە بەيبىتشىلىكتى قولداۋ ماسەلەلەرىن شەشۋ باعىتىنداعى ۇجىمدىق تاسىلدەردى پىسىقتاۋدا كەڭەستىڭ جۇمىسىن ىلگەرىلەتۋدەگى رەسەيدىڭ ماڭىزدى ءرول اتقاراتىنىن اتاپ ءوتتى.