مەملەكەت باسشىسى «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆتى قابىلدادى.
پرەزيدەنتكە «استانا» حالىقارالىق قارجى ورتالىعىنىڭ (احقو) بىلتىرعى اتقارعان جۇمىستارىنىڭ قورىتىندىسى، سونداي-اق شەتەلدىك يۋريسديكسيادان قازاقستان رەسپۋبليكاسىنا كاپيتالدى قايتارۋ جانە كومپانيالاردى ەلىمىزگە قايتا تىركەۋ جونىندەگى تاپسىرمالاردىڭ ورىندالۋى تۋرالى ەسەپ بەرىلدى.
پرەزيدەنت اتالعان ۇدەرىستەردىڭ اسا ماڭىزدى ەكەنىنە نازار اۋدارىپ، ولاردىڭ جۇزەگە اسىرىلۋى قازاقستانعا ءىرى اكتيۆتەردىڭ قايتارىلۋىن قامتاماسىز ەتىپ قانا قويماي، سونىمەن قاتار قارجى ورتالىعىنىڭ ايماقتىق دەڭگەيدەگى باسەكەگە قابىلەتتىلىگىن كورسەتەتىنىن اتاپ ءوتتى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
قايرات كەلىمبەتوۆتىڭ ايتۋىنشا، قازىرگى كەزدە احقو-دا الەمنىڭ 63 ەلىنەن 1236 كومپانيا تىركەلگەن. وسى ورتالىق ارقىلى تارتىلعان ينۆەستيسيالاردىڭ جالپى كولەمى 6،2 ميلليارد دوللاردى قۇرايدى. احقو-نىڭ Astana International Exchange (AIX) بيرجاسى ارقىلى 321 ميلليون دوللارعا جۋىق اكسيونەرلىك كاپيتال مەن 1،65 ميلليارد دوللاردى قۇرايتىن بورىشكەرلىك كاپيتال تارتىلعان. 18 قازاقستاندىق جانە 11 حالىقارالىق بروكەر احقو بيرجاسىنىڭ ساۋدا جونىندەگى مۇشەسى سانالادى.
مەملەكەت باسشىسىنا احقو-نىڭ قارجى قىزمەتتەرىن رەتتەۋ كوميتەتىنەن ليسەنزيا العان كومپانيالاردىڭ سانى بىلتىر ەكى ەسە ءوسىپ، 46-عا جەتكەنى تۋرالى مالىمەت بەرىلدى. وتكەن جىلى AFSA يسلام بانكىنە جانە يسلام قارجىلاندىرۋ كومپانياسىنا العاش رەت ليسەنزيا بەردى. بۇدان بولەك احقو سوتى جانە حالىقارالىق اربيتراج ورتالىعى بىرلەسە وتىرىپ، 1000-نان استام داۋلى ىستەردى قاراعان.