مەملەكەت باسشىسى پولشا سەناتىنىڭ مارشالى توماش گرودزكييدى قابىلدادى

مەملەكەت باسشىسى قاسىم-جومارت توقايەۆ ەلىمىزگە رەسمي ساپارمەن كەلگەن پولشا رەسپۋبليكاسى سەناتىنىڭ مارشالى (سپيكەرى) توماش گرودزكييمەن كەزدەسۋ وتكىزدى، دەپ حابارلايدى Almaty-akshamy.kz 

اڭگىمەلەسۋ بارىسىندا ەكىجاقتى ىنتىمىقتاستىقتى دامىتۋ پەرسپەكتيۆاسى تالقىلاندى.

– پارلامەنتتىڭ بۇرىنعى سپيكەرى رەتىندە پارلامەنتارالىق ديپلوماتيانى دامىتۋعا باسا ءمان بەرەمىن. ەلدەرىمىزدى بۇرىننان بەرى كەلە جاتقان دوستىق جانە كوپتەگەن باعىتتار بويىنشا ىنتىماقتاستىق بايلانىستىراتىنىن اتاپ وتكىم كەلەدى. پولشانى قازاقستاننىڭ ورتالىق ەۋروپاداعى ماڭىزدى ءارى سەنىمدى سەرىكتەسى دەپ بىلەمىز. پولشادا بولىپ جاتقان جاعدايدى ءجىتى باقىلاپ وتىرامىز. ءسىزدىڭ ەلىڭىزگە جانە حالقىڭىزعا زور قۇرمەتپەن قارايمىز، – دەدى قاسىم-جومارت توقايەۆ.

قازاقستان پرەزيدەنتى مەملەكەت باسشىلارى اراسىندا سەنىمدى ديالوگ ورناعانىن جانە وسىنداي قارىم-قاتىناستار ەكى ەلدىڭ زاڭ شىعارۋشى ورگاندارى دەڭگەيىندە دە جالعاساتىنىن اتاپ ءوتتى.

– ىنتىماقتاستىعىمىزدىڭ كەلەشەگى زور دەپ ويلايمىن. ءسىزدىڭ ساپارىڭىز – وسى ءوزارا اۋقىمدى ىقپالداستىقتىڭ ايقىن دالەلى، – دەدى قازاقستان پرەزيدەنتى.

ءوز كەزەگىندە توماش گرودزسكيي قاسىم-جومارت توقايەۆقا قوناقجايلىق كورسەتكەنى ءۇشىن العىس ءبىلدىرىپ، قازاقستان پارلامەنتى قوس پالاتاسىنىڭ توراعالارىمەن تابىستى كەزدەسۋلەر وتكىزگەنى تۋرالى ايتتى.  

– قازاقستانعا ساپارىمىز ەكى ەل اراسىنداعى ءوزارا بايلانىستى دامىتۋعا تىڭ سەرپىن بەرەدى دەپ ويلايمىن. تاۋەلسىزدىكتىڭ 30 جىلى ىشىندە سىزدەردىڭ ەلدەرىڭىزدىڭ دامۋ قارقىنى تاڭعالدىرعانىن شىنايى تۇردە مويىندايمىز. بۇل قازاقستاننىڭ تۇڭعىش پرەزيدەنتىنىڭ كورەگەندىلىگىنىڭ ارقاسىندا جۇزەگە اسىرىلدى. حالىقتارىمىز ەكونوميكالىق داعدارىستىڭ كۇردەلى كەزەڭىندە دامي باستادى. قازاقستاندى دامىتۋ، نۇر-سۇلتان قالاسىن وركەندەتۋ جانە ەلىڭىزدە دەموكراتيانى قالىپتاستىرۋ جولىنداعى جەتكەن جەتىستىكتەرىڭىز بىزگە ەرەكشە اسەر ەتتى، – دەدى پولشا سەناتىنىڭ سپيكەرى.

كەزدەسۋ بارىسىندا ەكى ەل اراسىنداعى ساۋدا-ەكونوميكالىق، ينۆەستيسيالىق، ينفراقۇرىلىمدىق جانە ءبىلىم بەرۋ سالالارى بويىنشا بايلانىستاردى دامىتۋ الەۋەتى اتاپ ءوتىلدى.

توماش گرودزكيي اقمولا وبلىسىنا ساپارمەن بارىپ، ونداعى پولياك دياسپوراسى وكىلدەرىمەن وتكىزگەن كەزدەسۋىنە قاتىستى وي-پىكىرىن ورتاعا سالدى. پولشا پارلامەنتى جوعارعى پالاتاسىنىڭ باسشىسى دەپورتاسيا جىلدارىندا قازاق حالقىنىڭ دوستىق نيەتى مەن قوناقجايلىلىعىنىڭ ارقاسىندا قازاقستان پولياكتاردىڭ ەكىنشى وتانىنا اينالعانىن اتاپ ءوتتى.