مەملەكەت باسشىسى ۇلتتىق قۇرىلتايدىڭ ءۇشىنشى وتىرىسىندا اتىراۋ جۇرتشىلىعى وبلىستىڭ ەكولوگيالىق احۋالىنا الاڭداپ وتىرعانىنان حاباردار ەكەنىن، قالادا كارىز جۇيەسىن، سۋ قۇبىرىن سالۋدىڭ ماڭىزدىلىعىن، ينفراقۇرىلىم ابدەن ەسكىرگەنىن، سونىڭ كەسىرىنەن جەراستى سۋلارى جانە جايىق وزەنى لاستانىپ جاتقانىن ايتتى.
«مەن جۋىردا پرەزيدەنتتىك جاستار كادر رەزەرۆىنىڭ مۇشەلەرىمەن ارنايى كەزدەستىم. سوندا ايتقان ويىمدى ەلىمىزدىڭ بارشا جاستارىنا تاعى دا قايتالاعىم كەلەدى. قازاقستاننىڭ بولاشاعى – سىزدەردىڭ قولدارىڭىزدا. كوپ ۇزاماي مەملەكەتتى باسقارۋ ءىسى، ياعني، ەل تىزگىنى بۇگىنگى جاستاردىڭ قولىنا وتەدى. سىزدەر وسى جاۋاپكەرشىلىكتى قازىردەن باستاپ سەزىنۋلەرىڭىز قاجەت. وزدەرىڭىزگە جۇكتەلەتىن تاريحي ميسسيانى ورىنداۋعا قاشاندا دايىن بولۋلارىڭىز كەرەك. ءبىز جاسامپاز حالىق بولۋىمىز قاجەت. وعان الەۋەتىمىز تولىق جەتەدى. سان عاسىرلىق تاريحىندا قازاق مەملەكەتتىگىنىڭ قۇرىلىمى تالاي رەت وزگەردى. ءبىراق ەلدىگىمىزدىڭ تۇعىرى قاشاندا – بەرىك، ۇلتىمىزدىڭ رۋحى – ءاردايىم اسقاق. ءبىز وزىق ويلى ۇلت رەتىندە تەك قانا العا ۇمتىلۋىمىز كەرەك. ءونىمدى ەڭبەك ەتىپ، ساپالى ءبىلىم الىپ، ورتاق ماقساتقا جۇمىلا ءبىلۋىمىز قاجەت. سوندا بولاشاعى جارقىن، قۋاتتى مەملەكەتتى بىرگە قۇرامىز»، - دەدى پرەزيدەنت.
مەملەكەت باسشىسى اتىراۋ وبلىسىنىڭ دامۋىنا ەرەكشە ءمان بەرۋ كەرەگىن، اسىرەسە قالاداعى قوقىس پوليگونىن دەرەۋ رەتكە كەلتىرۋى قاجەت ەكەنىن تىلگە تيەك ەتتى.
«ۇلتتىق قۇرىلتاي جۇمىسى جۇيەلى، ماڭىزدى قوعامدىق ينستيتۋت رەتىندە قالىپتاستى. قۇرىلتاي مۇشەلەرى ناعىز ەلدىك ماسەلەلەردى كوتەرەتىن «ءبىرتۇتاس كومانداعا» اينالۋعا ءتيىس. سىزدەر جۇمىس بارىسىندا كوپتەگەن ۇتىمدى ۇسىنىس بەرىپ جۇرسىزدەر. ءبىرقاتار باستاما جۇزەگە اسىرىلىپ جاتىر. بۇگىن دە جاڭا يدەيالار ايتىلدى. ونىڭ ءبارى مۇقيات قارالىپ، ماڭىزدى ۇسىنىستار بويىنشا ناقتى شارالار قولعا الىنادى. قۇرىلتاي بارىنشا ءتيىمدى ءارى وڭتايلى قىزمەت ەتىپ جاتىر دەپ سانايمىن. الداعى ۋاقىتتا دا بەلسەندى جۇمىستى جالعاستىرا بەرگەن ءجون. وزدەرىڭىز بىلەسىزدەر، مەن وسى باسقوسۋعا ايماق وكىلدەرىن شاقىرۋ تۋرالى تاپسىرما بەردىم. بۇگىن، مىنە، ورتامىزدا اتىراۋلىق اعايىندار دا وتىر. سونىڭ ىشىندە ەكولوگيا ماسەلەلەرىن كوتەرىپ جۇرگەن بەلسەندى ازاماتتار بار. جالپى اتىراۋ جۇرتشىلىعى وبلىستىڭ ەكولوگيالىق احۋالىنا الاڭداپ وتىرعانىن بىلەمىن. قالادا كارىز جۇيەسىن، سۋ قۇبىرىن سالۋ وتە ماڭىزدى. ينفراقۇرىلىم ابدەن ەسكىرگەن. سونىڭ كەسىرىنەن جەراستى سۋلارى جانە جايىق وزەنى لاستانىپ جاتىر. وبلىس ورتالىعىندا قوقىستى سۇرىپتاۋعا جانە وڭدەۋگە قاتىستى تۇيتكىلدەر بار. اتىراۋدا قوقىس سۇرىپتايتىن كەشەن سالىنعان. اكىمدىك ونى جاقىن ارادا ىسكە قوسۋعا ءتيىس. سونداي-اق قوقىس پوليگونىن دەرەۋ رەتكە كەلتىرۋى قاجەت. بۇل ماسەلەلەر مىندەتتى تۇردە ءوز شەشىمىن تابۋى كەرەك. ءقازىر وسىعان بايلانىستى ناقتى جۇمىس جاسالىپ جاتىر. ۇكىمەتكە جانە وبلىس اكىمدىگىنە بۇل ماڭىزدى جۇمىستى اياعىنا دەيىن جەتكىزۋدى تاپسىرامىن. بۇل ماسەلە مەنىڭ باقىلاۋىمدا بولادى. جالپى اتىراۋ وبلىسىنىڭ دامۋىنا ەرەكشە ءمان بەرۋ كەرەك. سوندىقتان ۇكىمەت پەن اكىمدىك ارنايى جوسپار بويىنشا جۇمىس ىستەيدى»، - دەپ اتاپ ءوتتى قاسىم-جومارت توقايەۆ.
سونداي-اق پرەزيدەنت اتىراۋداعى ونكولوگيا ورتالىعىن سالۋعا جەر قويناۋىن يگەرۋمەن اينالىساتىن كاسىپورىندار قارجى بولەتىنىن حابارلادى.
«مەن كەزىندە اتىراۋدا ونكولوگيا ورتالىعىن سالۋ تۋرالى تاپسىرما بەردىم. ءبىراق، قارجى ماسەلەسى تولىق شەشىلمەي، سوزىلىپ كەتتى. ەندى وعان جەر قويناۋىن يگەرۋمەن اينالىساتىن كاسىپورىندار قارجى بولەتىن بولدى. قۇرىلىس كەلەسى جىلى اياقتالادى. سونداي-اق، وبلىس اكىمىنىڭ ايتۋىنشا، راديولوگيا كورپۋسىنىڭ قۇرىلىسىن قارجىلاندىرۋ ماسەلەسى دە شەشىمىن تاپتى. بۇل نىسان جىل سوڭىنا دەيىن سالىنىپ بىتەدى. وسى جوبالارعا دەمەۋشىلىك كورسەتكەن ازاماتتارعا جانە كومپانيالارعا ريزاشىلىعىمدى بىلدىرەمىن. بۇدان بولەك، بيىل بىرنەشە ەمحانا، وڭالتۋ (رەابيليتاسيا) ورتالىعى جانە باسقا دا الەۋمەتتىك نىساندار پايدالانۋعا بەرىلەدى»، - دەدى مەملەكەت باسشىسى.