مەملەكەت باسشىسى ماۋلەن اشىمبايەۆتى قابىلدادى

پرەزيدەنت قازىرگى جاعدايدا سەزد وتكىزۋدىڭ ماڭىزى جوعارى ەكەنىنە توقتالدى.

قاسىم-جومارت توقايەۆقا 14-15 قىركۇيەكتە ەلوردادا وتەتىن الەمدىك جانە ءداستۇرلى دىندەر كوشباسشىلارىنىڭ VII سەزىنە دايىندىق تۋرالى مالىمەت بەرىلدى، دەپ حابارلايدى Almaty-akshamy.kz اقورداعا سىلتەمە جاساپ.

پارلامەنت سەناتىنىڭ ءتوراعاسى، سەزد حاتشىلىعىنىڭ مەڭگەرۋشىسى ماۋلەن اشىمبايەۆ ءدىنارالىق فورۋمعا 50-دەن اسا ەلدەن 100-دەن استام دەلەگاسيا كەلەتىنىن جەتكىزدى. اتالعان جيىنعا ريم پاپاسى فرانسيسك، ءال-ازھاردىڭ جوعارعى يمامى شەيح احماد ات-تايەب جانە باسقا دا دىندەر كوشباسشىلارى قاتىسادى دەپ جوسپارلانىپ وتىر.

سەنات ءتوراعاسىنىڭ ايتۋىنشا، الداعى ءىس-شارا الەمدىك بۇقارالىق اقپارات قۇرالدارىنىڭ قىزىعۋشىلىعىن تۋدىرىپ وتىر. 200-دەن استام شەتەلدىك جانە 300-دەن استام قازاقستاندىق ب ا ق وكىلدەرى اككرەديتاسيادان وتكەن.

سەزد اياسىندا دەكلاراسيا قابىلدانباق. بۇل قورىتىندى قۇجات فورۋمعا قاتىسۋشىلاردىڭ وركەنيەتارالىق جانە كونفەسسياارالىق، سونداي-اق جاھاندىق دامۋدىڭ وزەكتى ماسەلەلەرىنە دەگەن ۇستانىمىن بىلدىرەدى. 

قاسىم-جومارت توقايەۆ جاھاندىق ديالوگ مادەنيەتىن ىلگەرىلەتۋ قاجەتتىگىن جانە قازاقستاننىڭ وسى ۇدەرىسكە قاتىسۋى ماڭىزدى ەكەنىن اتاپ ءوتتى.

مەملەكەت باسشىسىنا سەناتتىڭ الداعى ۋاقىتقا ارنالعان جۇمىس جوسپارى باياندالدى.