ءماجىلىستىڭ قازىرگى زاڭ شىعارۋ قىزمەتى تۋرالى اقپارات بەرىلدى.
قازاقستان پرەزيدەنتى قاسىم-جومارت توقايەۆ ءماجىلىس ءتوراعاسى ەرلان قوشانوۆتى قابىلدادى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
پرەزيدەنتكە پارلامەنت ءماجىلىسىنىڭ قازىرگى زاڭ شىعارۋ قىزمەتى تۋرالى اقپارات بەرىلدى. اتاپ ايتقاندا، ءماجىلىس دەپۋتاتتارى «ادام قۇقىقتارى جونىندەگى ۋاكىل تۋرالى»، «كونستيتۋسيالىق سوت تۋرالى»، «پروكۋراتۋرا تۋرالى» زاڭ جوبالارىن، سونداي-اق ءبىرقاتار كونستيتۋسيالىق جانە باسقا دا زاڭدارعا ەنگىزىلەتىن وزگەرىستەردى قاراستىرىپ، سەناتقا جولدادى. اتالعان قۇجاتتاردى تالقىلاۋعا ساراپشىلار توبى قاتىستى جانە قوعام مەن ب ا ق ءۇشىن جاريا تۇردە ءوتتى.
پالاتا ماقۇلداعان زاڭ جوبالارى بيىلعى 5 ماۋسىمدا وتكەن رەفەرەندۋمدا حالىق داۋىس بەرگەن كونستيتۋسيالىق رەفورمالاردىڭ نەگىزگى ەرەجەلەرىن جۇزەگە اسىرۋعا باعىتتالعان. ەنگىزىلەتىن زاڭ نورمالارى ازاماتتاردىڭ كونستيتۋسيالىق قۇقىقتارىنىڭ قورعالۋىن كۇشەيتۋگە جانە تۇرعىنداردىڭ ەلىمىزدىڭ ساياسي ومىرىنە ارالاسۋ مۇمكىندىگىن كەڭەيتۋگە سەپتىگىن تيگىزەدى.
ەرلان قوشانوۆ قاسىم-جومارت توقايەۆقا پارلامەنتتىك ديپلوماتيا جانە شەت مەملەكەتتەردىڭ زاڭ شىعارۋشى ورگاندارىمەن اراداعى ىس-ارەكەتتەر اياسىنداعى جۇمىستاردىڭ نەگىزگى باسىمدىقتارى تۋرالى ايتتى.
ءماجىلىس ءتوراعاسى مەملەكەت باسشىسىنا تۇركيانىڭ يزنيك قالاسىندا وتكەن IV دۇنيەجۇزىلىك كوشپەندىلەر ويىندارىنىڭ سالتاناتتى اشىلۋ راسىمىنە ەلىمىزدىڭ دەلەگاسياسىنىڭ قاتىسقانى جونىندە باياندادى. تۇركى قوعامداستىعى V دۇنيەجۇزىلىك كوشپەندىلەر ويىندارىن 2024 جىلى قازاقستاندا وتكىزۋ جونىندەگى ۇسىنىستى ءبىراۋىزدان قولدادى.