پرەزيدەنت قاسىم-جومارت توقايەۆ «اقوردا» رەزيدەنسياسىندا ەلىمىزدىڭ بيزنەس-قوعامداستىعى وكىلدەرىمەن كەزدەسۋ وتكىزدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
قاسىم-جومارت توقايەۆ مەملەكەتتى ودان ءارى دامىتۋ جولىنداعى وتاندىق كاسىپكەرلىكتىڭ ءرولىن تالقىلاۋ بۇگىنگى ءىس-شارانىڭ نەگىزگى ماقساتى ەكەنىن اتاپ ءوتتى.
«قازاقستان حالقىنا جولداۋىمدا ەكونوميكالىق ساياساتىمىزدىڭ نەگىزگى ماقساتى – بۇكىل ەلىمىزدىڭ ءال-اۋقاتىن ساپالى جانە ينكليۋزيۆتى تۇردە جاقسارتۋ ءىسى وزگەرمەيتىنىن ەرەكشە اتاپ ءوتتىم. بۇل ماقساتقا ەركىن ءارى ءتيىمدى نارىقتىق ەكونوميكا قۇرۋ ارقىلى عانا قول جەتكىزۋگە بولادى. مەملەكەتتىڭ ەكونوميكاداعى جەتەكشى ءرولى، اسىرەسە مەملەكەتتىڭ بيزنەس ىسىنە ارالاسۋى كەلمەسكە كەتەدى جانە سولاي بولۋعا ءتيىس. مەملەكەتتىڭ مىندەتى – زاڭعا باعىناتىن بيزنەسكە ەل ىشىندە دە، حالىقارالىق نارىقتا دا قولداۋ كورسەتۋ»، – دەدى مەملەكەت باسشىسى.
ونىڭ ايتۋىنشا، ەكونوميكانى مونوپوليادان ارىلتۋ جانە جاڭا نارىقتار اشۋ جۇمىستارى جالعاسادى.
«باسەكەلەستىك جاعدايى تەڭەستىرىلەدى. ەندى قانداي دا ءبىر تۇلعاعا باسىمدىقتار بەرىلمەيدى. مەملەكەتتىك اپپاراتتاعى بايلانىستارى مەن ونىڭ تاراپىنان جاسالاتىن قامقورلىققا قاراماستان، قازاقستاندا ادال بيزنەسپەن اينالىسۋ كەز كەلگەن ادامعا ءتيىمدى جانە ءقاۋىپسىز بولۋعا ءتيىس. بۇل – نەگىزگى ۇستانىم. ءبىز شاعىن جانە ورتا بيزنەستى دامىتامىز. كاسىپكەرلەردىڭ جاڭا بۋىنىن وسىرۋگە، جاڭا يدەيالار مەن وي-پىكىرلەردى قولداۋعا باسا ءمان بەرەمىز. سونىمەن قاتار مەملەكەت ءىرى، قالىپتاسقان بيزنەستى قولداۋدان باس تارتپايدى. كەرىسىنشە، ءبىز، ەڭ الدىمەن، سىزدەردى ادىلەتتى قازاقستان قۇرۋعا بەلسەنە اتسالىسۋعا شاقىرامىز»، – دەدى مەملەكەت باسشىسى.
قاسىم-جومارت توقايەۆ بيزنەس وكىلدەرىنە وسى ماقساتتارعا جەتۋ ءۇشىن ءبىرقاتار شەشىم قابىلداناتىنىن جەتكىزدى. اتاپ ايتقاندا، سالىق ساياساتى مەن سالىق اكىمشىلىگى تۇبەگەيلى قايتا قارالادى.
«2024 جىلى جاڭا سالىق كودەكسى كۇشىنە ەنەدى. ونى ازىرلەۋگە بيزنەس تىكەلەي قاتىسادى. بۇل – مەنىڭ ۇكىمەتكە بەرگەن تاپسىرمام. 2024 جىلدان «باسىنان باستاپ رەتتەۋ» جۇيەسى ىسكە قوسىلادى. بۇل بيزنەستى ارتىق اكىمشىلىك قىسىمنان بوساتادى. مەملەكەتتىك ساتىپ الۋ تاسىلدەرى مەن مەملەكەتتىك-جەكەمەنشىك ارىپتەستىك مودەلى تولىعىمەن قايتا قارالىپ، جەر قويناۋىن پايدالانۋ جونىندەگى زاڭناما جەتىلدىرىلەدى»، – دەدى قاسىم-جومارت توقايەۆ.
پرەزيدەنت سالالىق ساياساتىن، ونىڭ ىشىندە اگروونەركاسىپ كەشەنىن، قۇرىلىس سالاسىن، كولىك-لوگيستيكا سەكتورىن دامىتۋعا قاتىستى ادىستەردى قايتا قاراۋ ماڭىزدى دەپ سانايدى.
«ءبىزدىڭ الدىمىزدا بيلىكتىڭ، قوعام مەن بيزنەستىڭ كۇشىن بىرىكتىرۋ ارقىلى عانا ورىنداۋعا بولاتىن وراسان زور مىندەت تۇر. وعان قوسا، 21 قاڭتاردا وتكەن كەزدەسۋ بارىسىندا مەن ايتقان مەملەكەت پەن بيزنەستىڭ ءوزارا ىس-ارەكەت قاعيداتتارى وزگەرمەيتىنىن تاعى دا ناقتىلايمىن. ەستەرىڭىزگە سالا كەتەيىن، بۇل – ادال باسەكەلەستىك، قابىلداناتىن شەشىمدەردىڭ اشىقتىعى، مەملەكەتتىك ساياساتتىڭ بولجامدىلىعى، بيزنەستىڭ سالىققا ادالدىعى، كاسىپكەرلەردىڭ الەۋمەتتىك جاۋاپكەرشىلىگى»، – دەدى مەملەكەت باسشىسى.
قاسىم-جومارت توقايەۆ ءىرى بيزنەس وكىلدەرىن قوعامدى تولعاندىراتىن الەۋمەتتىك ماسەلەلەردى شەشۋدە شەت قالماۋعا شاقىردى.
«ادامي كاپيتالعا، اتاپ ايتقاندا، زاماناۋي بالاباقشالار، جايلى مەكتەپتەر، اۋرۋحانالار، ىرگەلى ۋنيۆەرسيتەتتەر سالۋعا، ءتۋريزمدى دامىتۋعا ينۆەستيسيا قۇيۋ دا ماڭىزدى. سىزدەر قايىرىمدىلىق ىستەر جاساۋدى جالعاستىرا بەرەتىندەرىڭىزگە سەنىمدىمىز. ءقازىر ەلىمىزدە مەكتەپتەردىڭ، ستۋدەنتتەر جاتاقحانالارىنىڭ، جاستارعا ارنالعان سپورت عيماراتتارىنىڭ تاپشىلىعى سەزىلەدى. سىزدەردىڭ كومەكتەرىڭىز ەل ءۇشىن ەلەۋلى بولار ەدى»، – دەدى پرەزيدەنت.
جيىن سوڭىندا مەملەكەت باسشىسى بيلىك پەن بيزنەس اراسىنداعى كونسترۋكتيۆتى ديالوگتى جالعاستىرۋدىڭ ماڭىزدى ەكەنىن اتاپ ءوتتى.