جانىبەك امانيازوۆقا 2 500 000 تەڭگە بەرۋدى ءوتىندىم
بۇگىن سوت وتىرىسىندا اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆاعا ءسوز بەرىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
اتىراۋداعى №2 قالالىق سوتتا وبلىس اكىمىنىڭ بۇرىنعى ورىنباسارى باقىتگۇل حامەنوۆاعا، وبلىستىق مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى اقىلبەك رىسقالييەۆكە جانە «بالقىتۋ» ج ش س ديرەكتورى ءومىرتاي اداموۆقا قاتىستى سوت ءوتىپ جاتىر.
«رىسقالييەۆ مەنى بۇل ىسكە تەك جاۋاپكەرشىلىكتەن جالتارۋ نەمەسە ءوز ىسىنە جازانى جەڭىلدەتۋ ءۇشىن تارتىپ وتىر. مەن ءارقاشان سىبايلاس جەمقورلىقتىڭ كەز كەلگەن تۇرىنە قارسى بولدىم. رىسقالييەۆ قاعازعا 4 500 000 تەڭگە دەپ جازىپ بەرگەندە، مەن مۇنى تۇسىنگەن جوقپىن. «مەن تۇسىنبەدىم» دەپ جاۋاپ جازدىم. ول: «التىن وردانىڭ» اقشاسى» دەپ جاۋاپ بەردى. مەن ونى دەمەۋشىلىكتىڭ اقشاسى بولار دەپ ءتۇسىندىم. ەگەر ول زاڭسىز سىياقى نەمەسە اداموۆتىڭ اقشاسى دەپ ايتقاندا، بۇل زاڭسىز ارەكەتتى جاساۋعا جول بەرمەيتىن ەدىم. مۇنى دەمەۋشىلىك اقشا دەپ ويلاپ، جانىبەك امانيازوۆقا 2 500 000 تەڭگە بەرۋدى ءوتىندىم. ونى «التىن وردا» ءىس-شاراسىن ۇيىمداستىرعانى ءۇشىن سارايشىق اۋىلىنىڭ اكىمىنە تاپسىرۋى ءتيىس ەدى. ال قالعان 2 000 000 تەڭگەنى رىسقالييەۆكە وزىڭە قالدىر دەدىم. بۇل اقشانى ءىس-شارانى وتكىزۋ كەزىندە ءبىز قارىز بولعان «اسىل ولكە» قوعامدىق بىرلەستىگىنە بەرۋ كەرەكتىگىن اشىپ ايتپادىم. جىبەرگەن قاتەلىگىم وسى ەدى»، - دەدى باقىتگۇل حامەنوۆا.
باقىتگۇل حامەنوۆا مەن اقىلبەك رىسقالييەۆتىڭ ءىسى ق ر قىلمىستىق كودەكسىنىڭ 366-بابى 3-بولىگىنىڭ 3-تارماعىمەن تەرگەلدى. ال «بالقىتۋ» ج ش س ديرەكتورى ءومىرتاي اداموۆ ق ر قىلمىستىق كودەكسىنىڭ 367-بابى 2-بولىگىمەن تەرگەۋگە الىنعان.
اتىراۋ وبلىسى اكىمىنىڭ ورىنباسارى قىزمەتىن اتقارعان باقىتگۇل حامەنوۆا اباي ەسكەرتكىشىن ورناتۋعا بولىنگەن قاراجاتتان 4،5 ملن تەڭگە پارا الدى دەپ ايىپتالىپ وتىر.
ەسكە سالا كەتەلىك، بۇدان بۇرىن باقىتگۇل حامەنوۆاعا قاتىستى سوت قايتا جالعاسقانىن جازعان ەدىك.