دالالىق جاعدايدا تاماق ءپىسىرۋدىڭ ەرەكشەلىكتەرى دە قاراستىرىلدى
اسكەري قىزمەتشىلەردى ازىق-تۇلىكپەن قامتاماسىز ەتۋدىڭ ساپاسىن ارتتىرۋ ءۇشىن قارۋلى كۇشتەردىڭ، قوعامدىق ۇيىمدار مەن اسكەري بولىمدەردە تاماقتانۋدى ۇيىمداستىراتىن فيرمالاردىڭ وكىلدەرىنىڭ قاتىسۋىمەن دوڭگەلەك ۇستەل وتىرىسى ءوتتى، دەپ حابارلايدى Almaty-akshamy.kz.
اتالعان شارا قورعانىس ءمينيسترى گەنەرال-پولكوۆنيك رۋسلان جاقسىلىقوۆتىڭ تاپسىرماسى بويىنشا ۇيىمداستىرىلدى. دەسانتتىق-شابۋىلداۋ اسكەرلەرى قولباسشىسىنىڭ باسقارماسىندا وتكەن وتىرىسقا قۇرلىق اسكەرلەرىنىڭ باس قولباسشىسى گەنەرال-مايور تالعات قويباقوۆ باسشىلىق جاسادى.
اسكەري قىزمەتشىلەردىڭ تاماقتانۋىن جاقسارتۋ ماسەلەلەرىن تالقىلاۋعا تاربيە جانە يدەولوگيالىق جۇمىستار دەپارتامەنتىنىڭ باستىعى گەنەرال-مايور سەرىك بورانبايەۆ، سونداي-اق سارباز انالارى كوميتەتىنىڭ وكىلدەرى الماتى قالاسىنان تاتيانا تروپينا جانە پاۆلودار وبلىسىنان ليليا حايرۋلينا قاتىستى. بەينەكونفەرەنسبايلانىس ارقىلى وتكەن دوڭگەلەك ۇستەل وتىرىسىنا وڭىرلىك قولباسشىلىقتار اسكەرلەرىنىڭ جانە اسكەر تەكتەرىنىڭ قولباسشىلارى، اسكەري بولىمدەردىڭ كومانديرلەرى قوسىلدى.
كەڭەسكە قاتىسۋشىلار اسكەري قىزمەتشىلەردى تاماقتاندىرۋ ساپاسى مەن ونى جاقسارتۋ مۇمكىندىكتەرىن، تاماقپەن قامتاماسىز ەتۋ سالاسىنداعى شارتتىق مىندەتتەمەلەردى ورىنداۋ، سونداي-اق سارباز اسحانالارىن كۇتىپ ۇستاۋ جانە ۋاقتىلى قىزمەت كورسەتۋ مەن جوندەۋ ماسەلەلەرىن تالقىلادى. ودان بولەك، دالالىق جاعدايدا تاماق ءپىسىرۋدىڭ ەرەكشەلىكتەرى دە قاراستىرىلدى.
دوڭگەلەك ۇستەل بارىسىندا دۇرىس جانە ۇيلەستىرىمدى تاماقتانۋ – اسكەري قىزمەتشىلەردىڭ دەنساۋلىعىن ساقتاۋ مەن نىعايتۋدىڭ كەپىلى ەكەنى اتاپ ءوتىلدى. بۇل اسكەري قىزمەتشىلەر عانا ەمەس، قوعام ءۇشىن دە ماڭىزدى ماسەلە. وسىعان بايلانىستى قوعامدىق ۇيىمداردىڭ وكىلدەرىمەن اسكەري بولىمدەردە تاماق ازىرلەۋدى ۇيىمداستىرۋدى باقىلاۋ، ازىق-تۇلىك نورمالارىن اسكەري قىزمەتشىلەرگە تولىق جەتكىزۋ بويىنشا بىرلەسكەن ءىس-شارالار وتكىزۋ ورىندى.
وتىرىس سوڭىندا قۇرلىق اسكەرلەرىنىڭ باس قولباسشىسى باسشىلىقتىڭ اسكەري قىزمەتشىلەردى قامتاماسىز ەتۋ ماسەلەلەرىندە اشىقتىقتى، سونداي-اق اسكەري قىزمەتتىڭ ساپاسى مەن بەدەلىن ارتتىرۋعا مۇددەلى قوعامدىق ۇيىمدارمەن ءاردايىم ىنتىماقتاستىق جۇرگىزۋگە دايىن ەكەنىن اتاپ ءوتتى.