پرەزيدەنتتىڭ قاتىسۋىمەن ەل تاۋەلسىزدىگىنىڭ 30 جىلدىعىنا ارنالعان سالتاناتتى جيىن ءوتتى
تاۋەلسىزدىكتىڭ 30 جىلدىعىنا ارنالعان سالتاناتتى ءىس-شارادا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ جەلتوقسان بوزداقتارىنىڭ ازاتتىق جولىنداعى ءرولىن، ەلىمىز تاۋەلسىزدىگىن ءبىر تابان جاقىنداتقان ۇلەسىن ايرىقشا اتاپ ءوتتى، دەپ حابارلايدى Almaty-akshamy.kz.
«كەشەگى جەلتوقسان قاھارماندارى ءبىز ءۇشىن تاۋەلسىزدىكتى ءبىر تابان جاقىنداتقانى انىق. اسقار تاۋ الىستاعان سايىن اسقاق كورىنەدى. ءبىزدىڭ بابالارىمىز قازاقتىڭ دەربەس مەملەكەت قۇرىپ، ەركىن ءومىر سۇرۋگە قۇقىلى ەكەنىن تاريح الدىندا دالەلدەدى. وسىلايشا، مىڭجىلدىقتار توعىساتىن تۇستا ازاتتىق تۋى كوگىمىزدە جەلبىرەدى. ۇلتتىڭ ەڭ ۇلى مۇراتى – تاۋەلسىزدىككە قول جەتكىزدىك. سول ساتتەن باستاپ قازاق ەلىنىڭ ۇلى كوشى بولاشاققا بەت تۇزەدى. حالقىمىز ءوز مەملەكەتىن قۇرۋعا كىرىستى. بۇل – تاريحي ادىلدىكتىڭ ورناۋى»، – دەدى قاسىم-جومارت توقايەۆ.