توقايەۆ ءوزىنىڭ بۇل ۇندەۋى ەلىمىزدەگى ءاربىر جاستىڭ جۇرەگىنە جەتەتىنىنە سەنىم ءبىلدىردى.
مەملەكەت باسشىسى قاسىم-جومارت توقايەۆ اباي وبلىسىنا جۇمىس ساپارى بارىسىندا وسكەلەڭ ۇرپاقتى بىلىمگە، عىلىمعا قۇشتار بولۋعا شاقىردى، دەپ حابارلايدى Almaty-akshamy.kz اقورداعا سىلتەمە جاساپ.
«ءبىر سوزبەن ايتقاندا، ەڭبەكقورلىق – قازىرگى زاماندا بىزگە اسا قاجەت قۇندىلىق. وسى قاعيدانى كەڭىنەن دارىپتەۋىمىز كەرەك. مەنىڭ مۇنى سەمەي تورىندە تۇرىپ ايتۋىمنىڭ وزىندىك سەبەبى بار. ويتكەنى، بۇل – ءاردايىم جاس ۇرپاقتى جاقسىلىققا، جاڭاشىلدىققا جەتەلەگەن جەر»، - دەدى پرەزيدەنت.
توقايەۆ ءوزىنىڭ بۇل ۇندەۋى ەلىمىزدەگى ءاربىر جاستىڭ جۇرەگىنە جەتەتىنىنە سەنىم ءبىلدىردى.
«شىن مانىندە، ءقازىر – ءبىلىم مەن عىلىم سالتانات قۇرعان زامان. مۇنى دالەلدەۋدىڭ ەش قاجەتى جوق. الەمدىك ەكونوميكادا جوعارى تەحنولوگيالىق ونىمدەردى جاساپ شىعاراتىن كومپانيالار العا شىقتى. بۇل – عىلىم كەلەشەكتىڭ بەت-بەينەسىن انىقتايدى دەگەن ءسوز»، - دەدى ول.
مەملەكەت باسشىسىنىڭ پىكىرىنشە، تىڭ يدەيا مەن وزىق وي كەز كەلگەن سالانى وركەندەتەدى.
«وسكەلەڭ ۇرپاق بىلىمگە، عىلىمعا قۇشتار بولۋى كەرەك. وسىنى جان-جاقتى دارىپتەۋگە مەملەكەت قانا ەمەس، بۇكىل قوعام جانە ءاربىر ازامات اتسالىسۋعا ءتيىس. وركەنيەتتى مەملەكەتتى تەك ءبىلىمدى ازاماتتار عانا قالىپتاستىرا الادى»، - دەدى قاسىم-جومارت توقايەۆ.
پرەزيدەنت جۋىردا اقش-تا جۇمىس ىستەپ جۇرگەن جاستارمەن كەزدەسكەنىن، ولار ءبىلىم الۋعا دەگەن ىنتا-جىگەرى مەن ەڭبەكقورلىعىنىڭ ارقاسىندا الەمنىڭ ءار تۇكپىرىندە تابىسقا جەتكەنىن اتاپ ءوتتى. ول وسىنداي جاستاردى ۇلگى تۇتۋعا شاقىردى.