پرەزيدەنت قاسىم-جومارت توقايەۆ شەرحان مۇرتازا اتىنداعى حالىقارالىق تاراز يننوۆاسيالىق ينستيتۋتىنىڭ ستۋدەنتتەر ۇيىندە وقۋ ورنىنىڭ وقىتۋشىلارىمەن جانە ستۋدەنتتەرمەن كەزدەستى، دەپ حابارلايدى Almaty-akshamy.kz. اقورداعا سىلتەمە جاساپ.
ينستيتۋت رەكتورى ەربولات ساۋرىقوۆ وقۋ ورنىنىڭ مامان دايارلاۋ ىسىندەگى جەتىستىكتەرى مەن الداعى دامۋ جوسپارىن تانىستىردى. 2019 جىلى بۇرىنعى «تاراز» قوناق ءۇيى رەكونسترۋكسيالاندى، قايتا جاساقتالعان جاتاقحانادا 500 ستۋدەنتكە بارلىق جاعداي جاسالعان.
قاسىم-جومارت توقايەۆ مەملەكەتتىڭ ءبىلىم سالاسىنا ايرىقشا ءمان بەرىپ وتىرعانىن اتاپ ءوتىپ، بۇگىندە ءبىلىم الامىن دەگەن ادامعا مۇمكىندىك مول ەكەنىن ايتتى.
– ەلىمىزدىڭ بولاشاعى – جاستار. جاڭا بۋىن، جاڭا تولقىن ءوسىپ كەلەدى. ءبىلىم الۋ وتە ماڭىزدى. ابايشا ايتقاندا، «تولىق ادام» دەگەنىمىز – ويى ۇشقىر، زەرەك، بىلىمگە قۇشتار ادام. ءار نارسەدە قاناعات بولۋى كەرەك. ءبىراق بىلىمگە كەلگەندە، قاناعات بولماۋى كەرەك. ءاردايىم ىزدەنۋ كەرەك. ەلىمىزدىڭ بولاشاقتا دامىپ، كوركەيگەن ەلگە اينالۋى، الدىمەن، سىزدەرگە بايلانىستى. ءبىز سىزدەرگە سەنەمىز، ۇلكەن ءۇمىت ارتامىز. بارشاڭىزعا ساتتىلىك تىلەيمىن! – دەدى مەملەكەت باسشىسى.
سونىمەن قاتار، مەملەكەت باسشىسى بايزاق اۋدانىندا جاڭادان اشىلعان كوكتال ورتا مەكتەبىنە دە باردى
مەكتەپ ماتەريالدىق-تەحنيكالىق جاعىنان تولىق جابدىقتالعان: 32 وقۋ كابينەتى، 4 كومپيۋتەر كابينەتى، 2 لينگوفون كابينەتى، روبوتوتەحنيكا كابينەتى، سپورت زالى، شەبەرحانا، كىتاپحانا، مەديسينالىق پۋنكتى جانە اسحاناسى بار. مەكتەپتە ماڭايداعى اۋىلداردان قاتىناپ وقيتىن بالالار ءۇشىن كولىك تاسىمالى ۇيىمداستىرىلعان. 2023-2025 جىلدارى «جايلى مەكتەپ» ۇلتتىق جوباسى اياسىندا جامبىل وبلىسىندا 9500 ورىندىق 13 مەكتەپ سالۋ جوسپارلانىپ وتىر. ونىڭ سەگىزى كەلەسى جىلى پايدالانۋعا بەرىلۋى ءتيىس. جالپى، پرەزيدەنتتىڭ تاپسىرماسىمەن 2023-2025 جىلدارى «جايلى مەكتەپ» ۇلتتىق جوباسى اياسىندا رەسپۋبليكا بويىنشا 800 مىڭ وقۋشىعا ارنالعان 400-دەن استام مەكتەپ سالىنادى.
