ق ر ءىىم وقۋ ورىندارىنىڭ دەلەگاسياسى اقش-قا وقۋ-تانىستىرۋ ساپارىمەن باردى.
قازاقستاندىق ءتارتىپ ساقشىلارى قوعامعا باعدارلانعان پوليسيا قىزمەتىن ۇيىمداستىرۋداعى قولدانىستاعى تاسىلدەرمەن تانىستى، دەپ حابارلايدى Almaty-akshamy.kz Polisia.kz-كە سىلتەمە جاساپ.
ۆەدومستۆو وكىلدەرىنىڭ مالىمەتىنشە، بۇل ساپاردىڭ ماقساتى – امەريكا قۇراما شتاتتارىندا پوليسيا كادرلارىن دايارلاۋ جانە قوعامعا باعىتتالعان پوليسيا سالاسىنداعى تاجىريبەسىن زەرتتەۋ بولاتىن. قازاقستاندىق پوليسەيلەر بۇۇ ەسىرتكى جانە قىلمىس جونىندەگى باسقارماسىنىڭ قازاقستانداعى باعدارلامالىق كەڭسەدەگى جانە ۆەناداعى شتاب-پاتەردەگى قىزمەتكەرلەرىمەن بىرگە دەلاۆەر، ۆيردجينيا شتاتتارى پوليسياسىنىڭ جانە مونتگومەري وكرۋگى پوليسيا دەپارتامەنتىنىڭ ارىپتەستەرىمەن كەزدەستى.
قازاقستاندىق ءتارتىپ ساقشىلارى كانديداتتاردى جالداۋ جانە جۇمىسقا الۋ پروسەستەرىمەن، بۇرىننان قىزمەت اتقاراتىن ساقشىلاردى جانە جاڭا قىزمەتكەرلەردى دايارلاۋعا ارنالعان وقۋ باعدارلامالارىمەن، سونداي-اق قوعامعا باعدارلانعان پوليسيا قىزمەتىن ۇيىمداستىرۋداعى قولدانىستاعى تاسىلدەرمەن تانىستى.
بۇدان بولەك، ەسىرتكىگە قارسى كۇرەس باسقارماسى اكادەمياسىندا (DEA) جانە فەدەرالدى تەرگەۋ بيۋروسىنىڭ اكادەمياسىندا (FBI) كەزدەسۋلەر كەزىندە كاسىپتىك وقىتۋ مەن ءتيىستى پوليسيا ينفراقۇرىلىمىنا ەرەكشە نازار اۋدارىلدى.