پرەزيدەنتكە وسى جىلدىڭ قاڭتار ايىنداعى كريمينوگەندىك احۋال تۋرالى اقپارات بەرىلدى.
ءمينيستردىڭ مالىمەتىنە سايكەس، كەشەندى الدىن الۋ شارالارىن جۇزەگە اسىرۋ ناتيجەسىندە كىسى ءولتىرۋ، دەنساۋلىققا اۋىر زيان كەلتىرۋ، توناۋ، ۇرلىق، بۇزاقىلىق، مال ۇرلىعى، سونداي-اق كوشەدە جاسالعان قىلمىستار سانى ايتارلىقتاي ازايعان، دەپ حابارلايدى t.me/aqorda_resmi
قاسىم-جومارت توقايەۆقا كوشى-قون جاعدايى، ۇيىمداسقان جانە ەسىرتكى قىلمىستارىنا قارسى شارالار، سونداي-اق قۇقىق بۇزۋشىلىقتار مەن جول-كولىك وقيعالارىنىڭ الدىن الۋ جۇمىستارىنىڭ ناتيجەلەرى جونىندە باياندالدى.
مارات احمەتجانوۆ سىبايلاس جەمقورلىققا قارسى ساياساتتىڭ 2022-2026 جىلدارعا ارنالعان پرەزيدەنت بەكىتكەن تۇجىرىمداماسى اياسىندا پوليسيا قىزمەتكەرلەرىنىڭ ادالدىعىن تەكسەرۋ (Integrity check) جونىندەگى پيلوتتىق جوبانىڭ العاشقى ناتيجەلەرى تۋرالى ەسەپ بەردى.
مينيستر شەتەلدىك اۆتوكولىكتەردى زاڭداستىرۋ جۇمىستارىنىڭ بارىسى جايىندا دا ايتتى. سونداي-اق قوعاممەن بىرلەسە وتىرىپ، قوعامدىق قاۋىپسىزدىكتى قامتاماسىز ەتۋدىڭ 2024-2028 جىلدارعا ارنالعان تۇجىرىمداماسى ازىرلەنىپ جاتقانى تۋرالى باياندادى.
مەملەكەت باسشىسى ازاماتتىق قوعام وكىلدەرى مەن جۋرناليستەرگە قارسى باعىتتالعان زاڭعا قايشى ارەكەتتەردى جانە ارانداتۋشىلىقتى اشكەرەلەۋ جۇمىستارىن جانداندىرۋدى تاپسىردى.
سونىمەن قاتار پرەزيدەنت ەلىمىزدەگى قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ جونىندە ءبىرقاتار تاپسىرما بەردى.