الماتىلىقتاردى الداعان جىگىتتەر ۇستالدى

ءقازىر قالامىزدا Anti Fraud رەسپۋبليكالىق ءىس-شاراسى ءوتىپ جاتىر.

الماتىدا پاتەر الاياقتارى قىمبات ەمەس جىلجىمايتىن مۇلىكتى جالعا بەرەمىز دەگەن جەلەۋمەن ازاماتتاردى الداعان، دەپ حابارلايدى Almaty-akshamy.kz Polisia.kz-كە سىلتەمە جاساپ.

الدانعانداردىڭ اراسىندا قالادا پاتەر جالداپ تۇرۋدى جوسپارلاعان 28 جاستاعى ارۋ دا بار. ول حابارلاندىرۋلار سايتىنان قولايلى باسپانانى تاپقان.

«اۋىزشا كەلىسىمگە سايكەس، ايەل وزىنە ۇناعان پاتەر ءۇشىن الدىن الا تولەم بەرۋى كەرەك ەدى. ول جارناما اۆتورىنىڭ كارتوچكالىق شوتىنا 100 مىڭ تەڭگە جىبەرگەن. الاياقتاردىڭ قۇربانى بولعانىن بىلگەن بويدا ايەل ادام المالى اۋداندىق پب-نا قاراستى پوليسيا بولىمىنە ارىزدانعان. العاشقى بولىپ 24 جاستاعى ج. ەسىمدى ازامات ۇستالدى. ونىڭ “مىندەتىنە” حابارلاندىرۋلاردى ورنالاستىرۋ جانە “الەۋەتتى كليەنتتەرمەن” حات الماسۋ كىرگەن. قىلمىستىڭ تاعى ءبىر سىبايلاسى – قىلمىستىق يدەيانىڭ اۆتورى، 28 جاستاعى ج. ەسىمدى ازامات. ول قاراجاتتى قولما-قول اقشاعا اينالدىرۋعا جاۋاپتى بولعان. بۇل كۇدىكتى دە ۇستالدى. قازىرگى ۋاقىتتا بانك شوتتارى بويىنشا جۇرگىزىلگەن ترانزاكسيالارعا تالداۋ جۇرگىزىلىپ، كۇدىكتىلەردىڭ باسقا دا قىلمىستىق قۇقىق بۇزۋشىلىق ەپيزودتارىنا قاتىستىلىعى انىقتالىپ جاتىر»، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.

ەسكە سالا كەتەيىك، وسى كۇندەرى الماتىدا اقپاراتتىق تەحنولوگيالاردى قولدانۋ ارقىلى جاسالعان قۇقىق بۇزۋشىلىقپەن كۇرەسۋ شارالارىنىڭ تيىمدىلىگىن ارتتىرۋعا باعىتتالعان Anti Fraud رەسپۋبليكالىق ءىس-شاراسى ءوتىپ جاتىر.