مەملەكەت باسشىسى قاسىم-جومارت توقايەۆ قاڭتار وقيعاسى كەزىندە قايتىس بولعان ازاماتتاردىڭ رۋحىنا مەشىتتە قۇران باعىشتاعاننان كەيىن حالىققا ۇندەۋ جاسادى، دەپ حابارلايدى اقوردا.
ارداقتى اعايىن!
بيىلعى جىل ەلىمىز ءۇشىن قايعىلى وقيعادان باستالدى. حالقىمىز وتە قيىن سىناقتى باستان وتكەردى. مەملەكەتىمىزدىڭ تۇتاستىعىنا، ازاماتتارىمىزدىڭ قاۋىپسىزدىگىنە، ەلىمىزدىڭ بولاشاعىنا ءقاۋىپ ءتوندى. ءبىز لاڭكەستەرگە دەر كەزىندە تويتارىس بەرىپ، بەتىن قايتاردىق. وكىنىشكە قاراي، دۇربەلەڭدە كوپتەگەن ازاماتىمىز قازا تاپتى. بۇل – ناعىز قاسىرەت.
قازىرگى تاڭدا ءتيىستى مەكەمەلەر ازاماتتاردىڭ ءاربىر ءىسى بويىنشا تەرگەۋ جۇمىستارىن جۇرگىزىپ جاتىر. ادام قۇقىعىن قورعاۋ ماسەلەسى مەن ءۇشىن اسا ماڭىزدى. قايعىلى جاعداي بۇكىل ەلدىڭ قابىرعاسىن قايىستىردى. وسىعان بايلانىستى جالپىۇلتتىق ازا تۇتۋ كۇنىن جاريالادىق.
سول قاسىرەتتى وقيعادان بەرى 40 كۇن ءوتتى. بۇگىن مارقۇمداردىڭ رۋحىنا قۇران باعىشتاۋ ءۇشىن مەشىتكە ارنايى كەلدىم. قازا بولعان ادامداردىڭ جاقىندارىنا تاعى دا كوڭىل ايتامىن.
مەملەكەت قارالى شاڭىراقتاردى قاراۋسىز قالدىرمايدى. مەن قايتىس بولعان ازاماتتاردىڭ وتباسىلارىنا قارجىلاي كومەك كورسەتۋدى تاپسىردىم. «قازاقستان حالقىنا» قورى دا وسى قايىرىمدىلىق جۇمىسقا اتسالىسادى دەپ ويلايمىن.
ەندى حالقىمىزدىڭ بەرەكە-بىرلىگى مەن تىنىشتىعىن بۇزۋعا جول بەرمەيمىز. بۇل – بيلىكتىڭ عانا ەمەس، بارشا ازاماتتارىمىزدىڭ ورتاق بورىشى. مۇنداي قاسىرەت ەشقاشان بولماسىن! قازاقستان حالقىنا سابىر تىلەيمىن!
ءبارىمىز تۇتاس ەل بولىپ، جاڭا قازاقستاندى قۇرايىق! جاڭا قازاقستان – بارشامىزدىڭ ورتاق ءۇيىمىز، ونىڭ ىرگەسىن بىرگە قالايىق! بۇل وسكەلەڭ ۇرپاق ءۇشىن كەرەك.
ەلىمىز امان، جۇرتىمىز تىنىش بولسىن!