مەملەكەت باسشىسى حالىقارالىق فۋتبول فەدەراسياسىنىڭ پرەزيدەنتىن قابىلدادى

كەزدەسۋ بارىسىندا قازاقستان فۋتبولىنىڭ الەۋەتىن ارتتىرۋ، سونداي-اق بالالار مەن جاسوسپىرىمدەر سپورتىن دامىتۋ ماسەلەلەرى تالقىلاندى.

قاسىم-جومارت توقايەۆ دجانني ينفانتينونى فيفا پرەزيدەنتى لاۋازىمىنا قايتا سايلانۋىمەن قۇتتىقتاپ، بۇكىل الەمدە، سونداي-اق ەلىمىزدە فۋتبولدىڭ دامۋىنا قوسقان ولشەۋسىز ۇلەسى ءۇشىن العىس ايتتى،-دەپ حابارلايدى Almaty-akshamy.kz. 

مەملەكەت باسشىسى فيفا-مەن اراداعى ىنتىماقتاستىقتى كەڭەيتۋ پەرسپەكتيۆاسىنا جوعارى باعا بەردى.

– ءسىزدىڭ ساپارىڭىز قازاقستان فۋتبولىن دامىتۋ تۇرعىسىنان وتە ماڭىزدى دەپ سانايمىن. الەمدە ەڭ تانىمال سپورت سانالاتىن فۋتبولدى دامىتۋدا اۋقىمدى ءىس اتقارىپ جاتقانىڭىزدى بىلەمىن. ءسىزدىڭ ەڭبەگىڭىزدى قۇرمەتتەيمىز جانە فيفا پرەزيدەنتى رەتىندە قولدايمىز. ءبىز فيفا-مەن جانە جەكە وزىڭىزبەن ىنتىماقتاستىقتى نىعايتا تۇسۋگە دايىنبىز، – دەدى قاسىم-جومارت توقايەۆ.  

مەملەكەت باسشىسىنىڭ ايتۋىنشا، قازاقستاندا 1 ميلليوننان استام ادام فۋتبولمەن جۇيەلى تۇردە شۇعىلدانادى. بۇگىندە ەلىمىزدىڭ بارلىق ايماعىندا 17 فۋتبول ورتالىعى جانە 2 اكادەميا جۇمىس ىستەيدى. وندا 7 مىڭنان استام بالا جاتتىعادى. دجانني ينفينتينو فيفا-نىڭ ۇزدىك حالىقارالىق تاجىريبەسىن بولىسۋگە  جانە قازاقستانداعى فۋتبولدىڭ دامۋىنا اتسالىسۋعا دايىن ەكەنىن ايتتى.

– ەلىڭىزگە بىرنەشە رەت كەلگەنمىن، ءبىراق فيفا پرەزيدەنتى رەتىندە العاش رەت كەلىپ تۇرمىن. وسى سەبەپكە وراي سىزبەن كەزدەسىپ وتىرعانىما قۋانىشتىمىن. بۇل تاماشا ەلدەگى ءاربىر فۋتبول جانكۇيەرى سياقتى ءسىزدىڭ دە فۋتبولدى ۇناتاتىنىڭىزدى بىلەمىن. ءبىز بىرلەسە وتىرىپ، كوپتەگەن اۋقىمدى ىستەردى اتقارا الامىز. قازاقستان تەك ايماقتا عانا ەمەس، الەمدىك  دەڭگەيدەگى وتە ماڭىزدى ەلگە اينالدى. قازاقستان – فيفا ءۇشىن سەنىمدى سەرىكتەس. ءبىز بىرگە جۇمىس ىستەۋىمىز قاجەت. سەبەبى وسى ەلدەگى، سونداي-اق باسقا ەلدەردەگى قوعامدى فۋتبول ارقىلى بىرىكتىرۋ ءۇشىن  مۇمكىندىك مول، – دەدى دجانني ينفانتينو.