جاۋاپكەرشىلىكتى تۇسىنە المايتىن بلوگەرلەردىڭ سانى ۋاقىت وتكەن سايىن ارتىپ بارادى.
وسىلاي دەگەن ءماجىلىس دەپۋتاتى اناس باققوجايەۆ بلوگەرلەردىڭ جاۋاپكەرشىلىگىن زاڭنامالىق تۇرعىدا بەكىتۋدى ۇسىندى، دەپ حابارلايدى Almaty-akshamy.kz
دەپۋتاتتىڭ ايتۋىنشا، ءقازىر الەۋمەتتىك جەلىلەردى پايدالانىپ، جالعان اقپارات تاراتاتىن بلوگەرلەر ءۇشىن ەشقانداي جاۋاپكەرشىلىك قاراستىرىلماعان.
ونىڭ سوزىنشە، ءقازىر ءوزىن بلوگەرمىن دەپ جۇرگەندەردىڭ دەنى – اقپاراتتىڭ راس-وتىرىگىن تەكسەرمەي، وڭاي جولمەن بايۋ ماقساتىندا كەز كەلگەن ادامعا جالا جابۋدان تايىنبايتىن، بوپسالاپ اقشا تاباتىن، اتاققۇمار، ەلدىڭ بەرەكەسىن بۇزىپ، قاۋىپسىزدىگىنە قاتەر توندىرەتىن ساۋاتسىز ادامدار.
"ءدال وسى بلوگەرلەر تالاي جىلدان بەرى ۇمىت بولعان قارجىلىق پيراميدانىڭ جاندانۋىنا دا سەبەپ بولعانىن ءبارىمىز جاقسى بىلەمىز. سول الاياقتارعا سەنىپ قالعان قانشاما ادام سۋيسيد جاسادى، قانشاسى دەنساۋلىعىنان ايىرىلدى، تاعى قانشاسى ۇيسىز-كۇيسىز قالىپ، قاڭعىرىپ كەتتى؟! ولاردىڭ وبالى كىمگە؟ ەلدە بولىپ جاتقان ءتۇرلى الەۋمەتتىك جاعدايلاردى ءوز ىڭعايىنا بۇرمالاپ، وعان ۇلتارالىق رەڭ بەرىپ، ەلگە جالعان اقپارات تاراتقان بلوگەرلەردىڭ دە ءىسى مايشاممەن قارالۋى كەرەك ەدى. راستالماعان قاۋەسەتتىڭ الەۋمەتتىك جەلى ارقىلى تەز تاراۋىنان قورداي وقيعاسىنىڭ نەمەن اياقتالعانى بارىڭىزگە ءمالىم"، - دەدى باققوجايەۆ پرەمەر-مينيستر مەن باس پروكۋرورعا جولداعان دەپۋتاتتىق ساۋالىندا.
ايتۋىنشا، جەكە ازاماتتاردىڭ ىشكەن-جەگەنىن، كيگەن كيىمىنە دەيىن اڭدىپ، قوعامدا كيبەربۋللينگ جاساپ جۇرگەن بلوگەرلەر توبى تاعى بار. ومىرگە دەگەن كوزقاراسى ەندى قالىپتاسىپ كەلە جاتقان جاستار وسى بلوگەرلەرگە ەلىكتەپ ءجۇر.
"ءبىز قىسقا عانا ۋاقىت ىشىندە ءسوزى مەن ىسىنە جاۋاپ بەرە المايتىن بلوگەرلەردىڭ وتانىنا اينالىپ كەتكەندەيمىز. بۇل – قوعام ءۇشىن دە، مەملەكەت ءۇشىن دە ءقاۋىپتى قۇبىلىس. ال، مۇنىڭ ءبارى بىزدەگى زاڭنامادا بلوگەر مارتەبەسى ايقىندالماعاننان. جاۋاپكەرشىلىكتىڭ جوق ەكەنىن سەزىنگەن مۇنداي ادامدار، ارينە، ويىنا كەلگەنىن ىستەيدى"، - دەپ اشىندى دەپۋتات.
بۇل رەتتە باققوجايەۆ كوپكە توپىراق شاشۋدان اۋلاق ەكەنىن، حالىققا شىن جاناشىر بلوگەرلەر دە بار ەكەنىن اتاپ ءوتتى.
"ءبىراق، الەۋمەتتىك جەلىلەرىن پايدالانىپ، ازاماتتار مەن ۇيىمداردىڭ قۇقىعى مەن زاڭدى مۇددەلەرىنە زيان كەلتىرەتىن جالعان اقپارات تاراتقانى ءۇشىن ولارعا قولدانىلاتىن شارا قاراستىرىلماعان. سول سەبەپتى ولاردا ەشقانداي جاۋاپكەرشىلىك جوق. ارتىن زەرتتەپ، شىندىق پا، جوق پا باستارىن قاتىرمايدى. باستىسى شۋ. باستىسى ءسوز. كىمنىڭ بولماسىن الدىندا تىكەڭدەپ، بەتتەن الىپ، جەكە باسىنا تيىسەدى. ءسوز بوستاندىعى دەگەن وسى ما؟ ءبىز وسىلايشا تۇتاستاي ءبىر ماماندىقتى قور قىلىپ وتىرمىز. جۋرناليستەردىڭ كوبى جۇمىسسىز! ولاردىڭ ءبىلىمى دە، تالابى دا بار. ولاردىڭ بلوگەرلەردەن ايىرماشىلىعى – ادەپتى، سوندىقتان دا جۇمىسسىز"، - دەيدى ماجىلىسمەن.
ول ءبىر جىل بۇرىن پرەزيدەنت مەملەكەتتىڭ مۇددەسىن، قوعامنىڭ سۇرانىسىن جانە مەدياسالانىڭ دامۋ ءۇردىسىن ەسكەرىپ، "ب ا ق تۋرالى" زاڭدى قايتا قاراۋدى تاپسىرعانىن ەسكە سالدى. الايدا، ايتۋىنشا، بۇل زاڭ ءالى دايىن ەمەس.
"سوندىقتان، بىرىنشىدەن، اتالعان زاڭ جوباسىنا جاۋاپتىلاردىڭ ارەكەتىنە ءتيىستى باعا بەرىلۋى كەرەك. ەكىنشىدەن، تەز ارادا "ب ا ق تۋرالى" زاڭدى پىسىقتاپ، ءماجىلىستىڭ اشىق تالقىلاۋىنا ەنگىزۋ قاجەت. اقپارات سالاسىنداعى جاۋاپكەرشىلىكتى تەك جۋرناليستەر ەمەس، بلوگەرلەر دە سەزىنەتىن ۋاقىت جەتتى"، - دەدى باققوجايەۆ.
دەپۋتات بلوگەرلەردىڭ جاۋاپكەرشىلىگىن وسى زاڭ جوباسى اياسىندا دەرەۋ قاراستىرۋ قاجەت ەكەنىن ايتتى. سەبەبى جاۋاپكەرشىلىكتى تۇسىنە المايتىن بلوگەرلەردىڭ سانى ۋاقىت وتكەن سايىن ارتىپ بارادى.