مەملەكەت باسشىسى ەۆگەنيي مۇحامەدجانوۆتى قابىلدادى

ول – ەكولوگ، ECO Network جوباسىنىڭ جەتەكشىسى.

كەزدەسۋ بارىسىندا ەكولوگيالىق مادەنيەتتى قالىپتاستىرۋ جانە قورشاعان ورتا پروبلەمالارىن شەشۋ ىسىنە ازاماتتاردى، ۇكىمەتتىك ەمەس ۇيىمدار مەن بيزنەستى كەڭىنەن تارتۋ ماسەلەلەرى تالقىلاندى، دەپ حابارلايدى Almaty-akshamy.kz اقورداعا سىلتەمە جاساپ.

قاسىم-جومارت توقايەۆ ەۆگەنيي مۇحامەدجانوۆتىڭ باستاماسىمەن جۇزەگە اسىرىلىپ جاتقان ECO Network جوباسىن وڭ باعالادى. مەملەكەت باسشىسى، ەڭ الدىمەن، ادامنىڭ مادەنيەتىن، ونىڭ قورشاعان ورتامەن قارىم-قاتىناسىن قالىپتاستىرۋدى، سونداي-اق تۇرمىستىق قالدىقتاردى بولەك سۇرىپتاۋ جانە قايتا وڭدەۋدى كوزدەيتىن «ەكوحاب»، «جاسىل كەڭسە»، «جاسىل مەكتەپ» باعىتتارى ەكومادەنيەتتى دارىپتەۋدىڭ ءتيىمدى تەتىگى رەتىندە جاپپاي تاراتۋعا لايىق تاجىريبە ەكەنىن اتاپ ءوتتى.

ەۆگەنيي مۇحامەدجانوۆتىڭ ايتۋىنشا، ءقازىردىڭ وزىندە ECO Network جوباسىنا قازاقستان بويىنشا جۇزدەگەن كومپانيا مەن وقۋ ورىندارى قوسىلعان. ولار بيزنەس پروسەستەرىنە ەكوستاندارتتاردى ەنگىزىپ، ەكونوميكانى دەكاربونيزاسيالاۋ ۇدەرىسىنە ەلەۋلى ۇلەس قوسىپ جاتىر.

پرەزيدەنت ەكولوگتىڭ باستامالارى جالپىۇلتتىق «تازا قازاقستان» ەكولوگيالىق اكسياسىنىڭ يدەولوگياسىمەن ۇندەس ەكەنىنە نازار اۋداردى.

قاسىم-جومارت توقايەۆ ەۆگەنيي مۇحامەدجانوۆتىڭ «جاسىل الماتى» جوبالىق كەڭسەسىنىڭ جەتەكشىسى رەتىندە شاھاردىڭ ەكولوگيالىق ماسەلەلەرىن شەشۋدىڭ ءتيىمدى ءارى كرەاتيۆتى تاسىلدەرىن جۇزەگە اسىراتىنىنا سەنىم ءبىلدىردى.