الماتى قالاسىنىڭ №7 قالالىق كلينيكالىق اۋرۋحاناسىندا العاشقى رەت جۇرەكتىڭ وتكىزگىشتىك جۇيەسىنە ەلەكترودتاردى يمپلانتاسيالاۋدىڭ زاماناۋي ءادىسىن قولدانا وتىرىپ، جۇرەك-قان تامىرلارى اۋرۋلارىن حيرۋرگيالىق ەمدەۋدىڭ جاڭا ءادىسى قولدانىلدى.
وپەراسيالار ۆروسلاۆ مەديسينالىق ۋنيۆەرسيتەتىنىڭ (پولشا) پروفەسسورى ياسەك گايەكتىڭ قاتىسۋىمەن شەبەرلىك –ساعاتى اياسىندا ءوتتى.
شەبەرلىك ساعاتى شەڭبەرىندە جۇرەك وتكىزگىشتىگىنىڭ بۇزىلۋى سالدارىنان ۇزاق ۋاقىت بويى زارداپ شەككەن 4 وتانداسىمىزعا شۇعىل وپەراسيا جاسالدى.
«بارلىق 4 پاسيەنتكە ورتاق دەرت- ۇزاق ۋاقىت بويى جۇرەك وتكىزگىشتىگىنىڭ بۇزىلۋى سالدارىنان زارداپ شەگۋى. ناۋقاستاردىڭ جۇرەك كولەمى ۇلعايعان، جۇرەكتىڭ سول جاق قارىنشاسىنىڭ ءبولۋ فراكسياسىنىڭ نورمالارى تومەندەگەن، جۇرەكشەلەردەگى حاوتيكالىق يمپۋلستارعا بايلانىستى تۇراقتى ەمەس جانە ءجيى جىلدام جۇرەك سوعىسى. وسىنداي بۇزىلىس ناتيجەسىندە ناۋقاستاردا باس اينالۋى، قاتتى ەنتىگۋ نەمەسە ەسىن جوعالتۋى، كەۋدەنىڭ سول جاعىنداعى اۋىرسىنۋ، ورتاشا فيزيكالىق اۋىرلىق كەزىندە اۋانىڭ جەتىسپەۋى بولۋى مۇمكىن»، - دەيدى №7 قالالىق كلينيكالىق اۋرۋحانانىڭ وپەراسياعا قاتىسۋشى اريتمولوگ دارىگەرى قانات ەرگەشوۆ.
بۇل وپەراسيا قاراجات جاعىنان وتە قىمبات وپەراسيالاردىڭ ءبىرى، ءبىزدىڭ ەلىمىزدە بۇل حيرۋرگيالىق وپەراسيالار ءمامس قاراجاتى ەسەبىنەن تەگىن جاسالادى.
پولشا ەلىنەن كەلگەن بىلىكتى كارديولوگ ماماننىڭ الماتىعا كەلگەنىنە بۇگىن ءۇش كۇن بولدى، بۇعان دەيىن ول قالالىق كارديولوگيالىق ورتالىقتا جانە ا. ن. سىزعانوۆ اتىنداعى ۇلتتىق عىلىمي حيرۋرگيا ورتالىعىندا وپەراسيالار جاسادى، تاجىريبەسىمەن ءبولىسىپ، شەبەرلىك ساعاتتار وتكىزدى.
پولياك پروفەسسورىنىڭ ايتۋىنشا، قايتا سينحرونداۋ تەراپيا ءادىسى جاقسى وڭ ناتيجە بەرەدى جانە بۇل ءادىستى حالىقارالىق قارديولوگتار قاۋىمداستىعى ۇسىنعان. گيس-شوعىرىن ۇنەمى ىنتالاندىرۋ-بۇل كلاسسيكالىق كارديوستيمۋلياسيانى الماستىرا الاتىن بىردەن- ءبىر قول جەتىمدى جانە ءقاۋىپسىز وپەراسيالىق تەحنولوگيا.
«مۇنداي ناۋقاستاردىڭ جاعدايىن ەسكەرە وتىرىپ، قازىرگى زاماناۋي مەديسينا ەمدەۋ ادىستەرىنىڭ كوپتەگەن بالاماسى جوق. ەمدەۋ ءتاسىلىن تاڭداۋدا وتە مۇقيات بولۋ كەرەك. وپەراسيا ناتيجەسىندە ءبىز جۇرەكتىڭ تابيعي جولمەن جيىرىلۋىنا قول جەتكىزەمىز. بۇل ءبىز تاڭداعان تەحنيكانىڭ ءسوزسىز ارتىقشىلىعىن دالەلدەيدى»، - دەپ ءتۇسىندىردى ياسەك گايەك.
جاڭا تەحنولوگيا ءتيىمدى، ناۋقاستىڭ اۋىر جاعدايىن جاقسارتۋعا، جۇرەك جۇمىسىن جاقسارتۋعا مۇمكىندىك بەرەدى. جۇرەكتىڭ جيىرىلۋىنىڭ فيزيولوگيالىق جولى ىنتالاندىرىلادى، سينحروندى تۇردە، ساۋ ادامدا قالىپتى بولۋى كەرەك. ناتيجەسىندە: اسقىنۋلاردىڭ دامۋ ءقاۋپى ازايادى، ناۋقاستىڭ ستاسيوناردا بولۋ ۋاقىتى قىسقارادى، ناۋقاستىڭ جاي-كۇيى جاقسارادى، ءومىر ءسۇرۋ ساپاسى جاقسارادى، ءومىر ءسۇرۋ ۇزاقتىعى ارتادى.