پرەزيدەنت قاسىم-جومارت توقايەۆ استانا حالىقارالىق فورۋمىنا قاتىسۋعا كەلگەنى ءۇشىن حەلگا شميدكە العىس ايتىپ، اتالعان فورۋم باتىس پەن شىعىس اراسىنداعى بايلانىستاردى نىعايتۋعا ىقپال ەتەتىن جاڭا الاڭ ەكەنىنە نازار اۋداردى، دەپ حابارلايدى Almaty-akshamy.kz.
– ءسىز باستاپ كەلگەن ەقىۇ دەلەگاسياسى وسى فورۋمدا كوپتەگەن تۇيتكىلدى ماسەلەلەردىڭ وڭ شەشىلۋىنە ەلەۋلى ۇلەس قوسادى دەپ سانايمىن. وكىنىشكە قاراي، ءقازىر الەمدە ونداي پروبلەمالار بار. ەقىۇ-مەن ىنتىماقتاستىقتى نىعايتۋ قازاقستان ءۇشىن باسىم باعىت سانالادى. ءبىزدى ۇيىمنىڭ ءرولى تۋرالى پىكىرلەر قايشىلىعى الاڭداتادى. 2010 جىلى استانادا وتكەن سامميتتەن كەيىن مينيستەرلەر دەڭگەيىندە دە، باسقا فورماتتا دا بىردە-بىر رەسمي قۇجات قابىلدانعان جوق. ارينە، بۇل – الاڭداتارلىق جايت. ءبىز ۇيىم اياسىنداعى بايلانىستاردى نىعايتۋ قاجەت ەكەنىنە بۇرىنعىداي كامىل سەنەمىز، – دەدى قاسىم-جومارت توقايەۆ.
مەملەكەت باسشىسىنىڭ ايتۋىنشا، قازاقستان – ەقىۇ-نىڭ بەلسەندى مۇشەسى. پرەزيدەنت ەلىمىزدىڭ ەقىۇ-مەن اراداعى ءوزارا ءتيىمدى سەرىكتەستىك جانە اشىقتىق رۋحىنداعى تىعىز قارىم-قاتىناسىن ودان ءارى نىعايتۋعا جانە وسى ۇيىمنىڭ باس حاتشىسى حەلگا شميدكە جان-جاقتى قولداۋ كورسەتۋگە دايىن ەكەنىن مالىمدەدى.