كەلەسى جىلى ەلىمىزدە ءىرى كادرلىق اۋىس-تۇيىستەر بولادى.
ۇكىمەتتىڭ كەڭەيتىلگەن وتىرىسىن وتكىزگەن پرەزيدەنت مينيسترلەر مەن اكىمدەردىڭ جۇمىسىن سىنعا الىپ، قاتاڭ ەسكەرتۋ جاسادى. الەۋمەتتىك-ەكونوميكالىق سالانى دامىتۋ ءۇشىن جەتى باعىتتى ايقىنداپ بەرىپ، ناقتى ىسكە كوشۋ قاجەتتىگىن ەسكەرتتى، دەپ حابارلايدى Almaty-akshamy.kz.
ەلدە ەكونوميكا كەرى كەتكەن، قىمباتشىلىق قىسىپ بارادى. ينفلياسيا سوڭعى 14 جىلدا بولماعان كورسەتكىش - 19،6 پايىزعا جەتتى. سوندىقتان مينيسترلەر مەن اكىمدەر بار كۇشىن حالىقتىڭ ءال-اۋقاتىن جاقسارتۋعا جۇمىلدىرۋى كەرەك. ءبىراق جۇرتتىڭ بيلىكتەن تالاپ ەتىپ وتىرعانى قۇرعاق ءسوز ەمەس، ناقتى ءىس،- دەدى مەملەكەت باسشىسى.
«ازاماتتارىمىز ناقتى وڭ وزگەرىستەر بۇگىن جانە ءقازىر بولادى دەپ ۇمىتتەنىپ وتىر. وسى ءۇمىت پەن سەنىمدى اقتاۋ – الدىمىزدا تۇرعان ەڭ باستى مىندەت ءارى قاستەرلى پارىز. سوندىقتان سايلاۋ الدىنداعى باعدارلامانى جۇزەگە اسىرۋ ءۇشىن ارنايى جوسپار قابىلداندى. بارلىق ءىس-شارا ۋاقتىلى جانە تولىق ورىندالۋى كەرەك. ءاربىر ءمينيستردىڭ، اكىمنىڭ جۇمىسى ستاتيستيكامەن، ەسەپ-قيساپپەن ەمەس، ناقتى ناتيجەمەن ولشەنەتىن بولادى»، - دەدى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ.
ارينە ەل ەكونوميكاسىن ارتتىرۋ ءۇشىن ينۆەستيسيا ساياساتىن قايتا قاراۋ كەرەك، - دەدى پرەزيدەنت. ويتكەنى بيىل ىسكە اسۋى ءتيىس 300-گە جۋىق ءىرى جوبانىڭ 43ء-ى عانا جۇزەگە اسقان. بۇل وتە تومەن كورسەتكىش. سالدارىنان مىڭداعان جۇمىس ورىنى اشىلماي قالدى. ەل ەكونوميكاسى ميللياردتاعان تەڭگە قارجىدان قاعىلدى. بۇدان بولەك ۇلتتىق بانك پەن ۇكىمەتكە ۇلتتىق قوردى باسقارۋ ءىسىن جەتىلدىرۋ تاپسىرىلدى. ويتكەنى قيت ەتسە، وسى قوردان ترانسفەرت الۋعا ابدەن اۋەستەنىپ العان. سونىڭ كەسىرىنەن تابىس 10 جىلدا نەبارى 1،6 پايىزعا عانا ارتقان. جالپى پرەزيدەنتتىڭ وتىرىستا جۇكتەگەن تاپسىرماسى كوپ. وڭدەۋ ونەركاسىبىن ارتتىرۋ، جەر قويناۋىن پايدالانۋ، اۋىل شارۋاشىلىعى مەن اۋىدىق جەرلەردى دامىتۋعا ەرەكشە كوڭىل ءبولىندى. قاسىم-جومارت توقايەۆتىڭ ايتۋىنشا، كەلەسى جىل اۋىلداردى كوركەيتۋگە باعىتتالماق. ول ءۇشىن تريلليون تەڭگە بولىنبەك.
سونداي-اق پرەزيدەنت الداعى جىلى كادرلىق اۋىس-تۇيىستەر بولاتىنىن، اسىرەسە، اكىم ورىنباسارلارى مەن ۆيسە-مينيسترلەر اۋىساتىنىن ايتتى. سوندىقتان باستىقتاردىڭ ۇنەمى بۇيرەگى بۇرىپ تۇراتىن ادامدارىمەن قوشتاسۋىنا تۋرا كەلەدى، - دەدى توقايەۆ.