پرەزيدەنت قاسىم-جومارت توقايەۆقا ەلىمىزدەگى زاڭدىلىق پەن قۇقىقتىق ءتارتىپتىڭ جاي-كۇيى، سونداي-اق قاداعالاۋشى ورگاننىڭ قىزمەتىندەگى باسىم باعىتتار جونىندە مالىمەت بەرىلدى.
بەرىك اسىلوۆ زاڭسىز يەمدەنىلگەن اكتيۆتەردى قايتارۋ ءۇشىن قابىلدانىپ جاتقان شارالار جانە وسى ماقساتتا جاڭادان قۇرىلعان كوميتەتتىڭ قىزمەتى تۋرالى باياندادى. باس پروكۋروردىڭ ايتۋىنشا، كوميتەت شەتەلگە شىعارىلعان اكتيۆتەردى ىزدەۋ، زاڭسىز سحەمالاردى اشكەرەلەۋ ءۇشىن جاساندى ينتەللەكتىنى پايدالانۋ ارقىلى IT تەحنولوگيالاردى قولدانادى، دەپ حابارلايدى اlmaty-akshamy.kz.
مەملەكەت باسشىسىنا ماڭىزدى ينۆەستيسيالىق جوبالاردى قۇقىقتىق تۇرعىدان قولداۋ جۇمىستارى جونىندە اقپارات بەرىلدى. قۇرامىنا سىرتقى ىستەر مينيسترلىگى، «قازاق-ينۆەست» ۇك» اق، «اتامەكەن» ۇكپ وكىلدەرى جانە بيزنەس-ومبۋدسمەن كىرەتىن ارناۋلى ۆەدومستۆوارالىق كوميسسيا ينۆەستيسيالىق احۋالدى جاقسارتۋعا باعىتتالعان العاشقى شارالاردى ازىرلەدى. پروكۋرورلار 900-دەن استام ينۆەستيسيالىق جوبانى باقىلاۋعا الدى. ءقازىردىڭ وزىندە 41 ينۆەستوردىڭ تۇيتكىلدى ماسەلەلەرى شەشىمىن تاپتى.
پرەزيدەنتكە ينۆەستيسيانىڭ قاۋىپسىزدىگىنە كەپىلدى كۇشەيتۋ ءۇشىن ينۆەستيسيالىق جوبانى جۇزەگە اسىرۋدىڭ بۇكىل پروسەسىن ناقتى ۋاقىت رەجيمىندە باقىلاۋدا ۇستاۋعا مۇمكىندىك بەرەتىن سيفرلىق شەشىمدەر ەنگىزۋ، سونداي-اق مەملەكەتتىك ورگانداردىڭ بيزنەسكە قاتىستى نەگىزگى شەشىمدەرىن پروكۋرورمەن كەلىسۋ ۇسىنىلدى.
سونىمەن قاتار قاسىم-جومارت توقايەۆقا ءۇش بۋىندى مودەل اياسىندا كاسىپكەرلەردى قىلمىستىق قۋدالاۋ 3 ەسە قىسقارعانى (614-تەن 204-كە دەيىن) جونىندە مالىمەت بەرىلدى. جالپى، ەلىمىز بويىنشا 1041 تۇلعانىڭ نەگىزسىز قىلمىستىق قۋدالاۋعا تارتىلۋىنا جول بەرىلگەن جوق. كونستيتۋسيالىق قۇقىق بۇزۋشىلىقتار سانى 29 پايىزعا قىسقاردى (310-نان 222-گە دەيىن).
بۇدان بولەك، پرەزيدەنتكە ازاپتاۋعا قارسى ءىس-قيمىل شارالارى جونىندە باياندالدى. مۇنداي ارەكەتتەردىڭ الدىن الۋ ءۇشىن 54 تۇزەتۋ مەكەمەسىندە 29 مىڭ بەينەكامەرا ورناتىلعان، سايكەسىنشە ازاپتاۋ فاكتىلەرىنە شاعىمدانۋ دا 94-تەن 17-گە دەيىن ازايعان.
سونداي-اق باس پروكۋرور قوعامدا رەزونانس تۋدىرعان قىلمىستاردىڭ تەرگەلۋ بارىسى جونىندە ەسەپ بەردى. اتالعان ماسەلەلەرمەن قاتار، حالىقارالىق ىنتىماقتاستىق باعىتىندا اتقارىلعان جۇمىستاردىڭ ناتيجەسى تانىستىرىلدى. اتاپ ايتقاندا، بيىل شەتەلدەن اۋىر جانە اسا اۋىر قىلمىس جاسادى دەپ ايىپ تاعىلعان 40 ادام ەكستراديسيالاندى. جالپى قازاقستان قىلمىستىق-قۇقىقتىق سالا بويىنشا الىس شەتەلدىڭ 34 مەملەكەتىمەن 74 شارتقا قول قويدى.
كەزدەسۋ سوڭىندا قاسىم-جومارت توقايەۆ ەلىمىزدىڭ تىنىس-تىرشىلىگىنە قاتىستى بارلىق سالادا زاڭنىڭ ساقتالۋىن قامتاماسىز ەتۋ ءىسىن كۇشەيتۋ قاجەت ەكەنىنە نازار اۋداردى.