بۇل جايىندا وتكەن سەنبىدە، ياعني 11 قاراشا كۇنى ەر-رياد قالاسىندا وتكەن ءسامميتتىڭ قورىتىندى دەكلاراسياسىندا ايتىلدى.
سەنبى كۇنى اراب جانە ءبىرقاتار يسلام ەلدەرىنىڭ باسشىلارى ساۋد ارابياسىنىڭ استاناسىندا باس قوسىپ پالەستينا-يزرايل ماسەلەسىن تالقىلادى. اسىرەسە گازادا 11 مىڭنان استام ادامنىڭ جانىن جالماعان قاندى قاقتىعىستى نەگىزگى تاقىرىپ ەتتى. جيىن سوڭىندا تاراپتار ورتاق دەكلاراسياعا قول قويدى. وندا اراب جانە يسلام ەلدەرىنىڭ ءيزرايلدى اسكەري قىلمىس بويىنشا ايىپتاپ، حالىقارالىق سوتقا شاعىم تۇسىرەتىنى ايتىلعان. دالىرەك ايتساق، حالىقارالىق قىلمىستىق سوتىنىڭ پروكۋرورىنان ءيزرايلدىڭ اسكەري قىلمىستارى بويىنشا تەرگەۋ جۇرگىزۋدى تالاپ ەتكەن، دەپ حابارلايدى اlmaty-akshamy.kz.
دەكلاراسيادا حالىقارالىق سوتتىڭ پروكۋرورىنان ءيزرايلدىڭ وسىعان دەيىن يەرۋساليمدى قامتىعان پالەستينا جەرىندە جاساعان اسكەري قىلمىستارىنا قاتىستى تەرگەۋدى تولىق اياقتاۋدى تالاپ ەتكەن. سونىڭ قاتارىندا ادامزاتقا قارسى قىلمىس فاكتىلەرىن دە اشىق تەرگەۋدى سۇراعان.
دەكلاراسيا يسلام ىنتىماقتاستىق ۇيىمى مەن اراب ليگاسىنىڭ بارلىق مۇشەلەرىنە اسكەري قىلمىس بويىنشا حالىقارالىق سوت پروكۋرورىنىڭ تەرگەۋىن قاداعالاۋدى مىندەتتەگەن. بۇعان قوسا 7 قازاننان كەيىنگى ءيزرايلدىڭ اسكەري نە سوعىس قىلمىستارىنا قاتىستى نەمەسە گۋمانيتارلىق قۇقىقتاردىڭ بۇزىلۋىنا قاتىستى دەرەكتەردى قۇجاتتاپ سوتقا دايىنداۋدى تاپسىرعان.
ايتا كەتەيىك، بۇعان دەيىن حالىقارالىق قاۋىمداستىق تارابىنان دا ءيزرايدى گازا جەرىندە اسكەري قىلمىس جاساپ جاتىر دەگەن ايىپتاۋلار ايتىلعان. يزرايلگە قاراتا بۇۇ جاعىنان ايىتىلعان ايىپتاردىڭ ىشىندە «سوعىس قىلمىسىنا» قاتار «ادامداردى كوللەكتيۆتى جازالاۋ» ءسوزى دە قولدانىلعان ەدى. رەسمي تەل-اۆيۆ بۇل ايىپتى جوققا شىعارادى.
ەر-ريادتاعى جيىندا تاعى نەلەر ايتىلدى؟ حالىقارالىق قىلمىستىق سوتىنىڭ قۇزىرەتى قانداي؟ سوعىس قىلمىسى دەگەن نە؟ يزرايل ۇستىنەن جاسالعان شاعىمنىڭ قانداي ناتيجەسى بولۋى مۇمكىن؟ بۇل جايىندا تولىعىراق «الماتى اقشامىنىڭ» №136 سانىنان وقي الاسىزدار.