مەملەكەت باسشىسى قاسىم-جومارت توقايەۆ V ۇلتتىق قۇرىلتاي وتىرىسىندا جۇك تاسىمالدايتىن اۋە كومپانياسىن قۇرۋ جونىندە بۇعان دەيىن بەرىلگەن تاپسىرمانىڭ ءتيىستى دەڭگەيدە ورىندالماي جاتقانىن ايتىپ، ۇكىمەتتىڭ شەشىمىن سىنعا الدى.
پرەزيدەنتتىڭ ايتۋىنشا، قازاقستاننىڭ جاھاندىق لوگيستيكا كارتاسىنان لايىقتى ورىن الۋى ءۇشىن جۇيەلى ۇمتىلىس پەن ناقتى ارەكەت ستراتەگياسى قاجەت. وسىعان بايلانىستى ۇكىمەتكە اۆياسيا سالاسىندا، اسىرەسە جۇك اۆياسياسى باعىتىندا ناقتى ناتيجەگە قول جەتكىزۋ مىندەتى قويىلعان.
– مەنىڭ ويىمشا، ەلىمىزدىڭ وسى ۋاقىتقا دەيىن اۋەدەگى جۇك تاسىمالىنىڭ ەۋرازيالىق ورتالىعىنا اينالماۋى – كەشىرىلمەيتىن كەمشىلىك. قاراپايىم تىلمەن ايتقاندا، بۇل – ابسۋرد، – دەدى قاسىم-جومارت توقايەۆ.
مەملەكەت باسشىسى ۇكىمەتتىڭ جۋىقتا قابىلداعان شەشىمى بۇل ماسەلەنى ودان ءارى ۋشىقتىرعانىن اتاپ ءوتتى. ونىڭ ايتۋىنشا، جۇك تاسىمالدايتىن مەملەكەتتىك اۋە كومپانياسىن قۇرۋعا قاتىستى قاتە شەشىم قابىلدانىپ، بۇل مىندەت «قازاقستان تەمىر جولى» ۇلتتىق كومپانياسىنا جۇكتەلگەن.
– ۇكىمەت جۇك تاسىمالدايتىن مەملەكەتتىك اۋە كومپانياسىن قۇرۋ ماسەلەسىندە دۇرىس ەمەس شەشىم قابىلدادى. ەگەر تاپسىرمانى ورىنداي الماساڭىزدار، بۇل ماسەلەنى جەكە قۇرىلىمدارعا تاپسىرىڭىزدار، – دەدى پرەزيدەنت.
سونداي-اق مەملەكەت باسشىسى جاقىندا وتكەن كەڭەيتىلگەن جينالىستا بۇل باعىتتاعى باستى كەدەرگىلەردىڭ ءبىرى – اۆياسيالىق وتىن باعاسى ەكەنى انىقتالعانىن ايتتى. ونىڭ سوزىنشە، قازاقستانداعى اۆياكەروسين قۇنى كورشى ەلدەردىڭ اۋەجايلارىمەن سالىستىرعاندا باسەكەگە قابىلەتسىز.
– شيكى مۇناي وندىرەتىن ەلدىڭ اۆياكەروسين باعاسى بويىنشا مۇناي وندىرمەيتىن مەملەكەتتەرمەن باسەكەگە تۇسە الماۋى – اقىلعا سىيمايدى. بۇل دا ابسۋرد ەمەس پە؟ – دەپ اتاپ ءوتتى قاسىم-جومارت توقايەۆ.
پرەزيدەنت ۇكىمەتكە جۇك اۆياسياسى سالاسىنداعى تۇيتكىلدەردى جەدەل شەشىپ، ناقتى ناتيجە كورسەتۋ قاجەتتىگىن قاداپ ايتتى.