مەملەكەت باسشىسى اتىراۋدا گاز-حيميا كەشەنىن ىسكە قوستى

امەريكالىق تەحنولوگيا

پرەزيدەنت اتىراۋ وبلىسىنا جۇمىس ساپارى بارىسىندا «Kazakhstan Petrochemical Industries Inc» جشس-نا قاراستى بىرىكتىرىلگەن گاز-حيميا كەشەنىن ىسكە قوستى، دەپ حابارلايدى Almaty-akshamy.kz اقوردا سايتىنا سىلتەمە جاساپ.
كەزدەسۋدە «قازمۇنايگاز» ۇلتتىق كومپانياسىنىڭ باسقارما ءتوراعاسى ماعزۇم مىرزاعالييەۆ مەملەكەت باسشىسىنا گاز-حيميا كەشەنىنىڭ دامۋ پەرسپەكتيۆاسى تۋرالى باياندادى. جالپى، كەشەن قۇرىلىسىنا 4300 ادام جۇمىسقا تارتىلعان. ول تولىق ىسكە قوسىلعاندا 631 ادام تۇراقتى جۇمىسپەن قامتىلادى. «تەڭىز» كەن ورنىندا وندىرىلەتىن شيكىزاتتى وڭدەۋگە باعىتتالعان كاسىپورىن جىلىنا 500 مىڭ توننا پوليپروپيلەن شىعارا الادى.
بۇل الەم بويىنشا پوليپروپيلەن ءوندىرىسىنىڭ 1 پايىزىن قۇرايدى. ءوندىرىس وشاعى ەلىمىزدىڭ پوليپروپيلەنگە دەگەن سۇرانىسىن وتەپ قانا قويماي، قۇرىلىس، مەديسينا، اۆتوموبيل قۇراستىرۋ، تاماق ونەركاسىبى سەكىلدى سالالاردا پوليپروپيلەننەن ءتۇرلى بۇيىم شىعاراتىن شاعىن جانە ورتا بيزنەستىڭ دامۋىنا ىقپال ەتەدى.
كاسىپورىندا امەريكالىق «Lummus Technology Inc» كومپانياسىنىڭ Catofin جانە Novolen تەحنولوگيالارى پايدالانىلادى. الەمدە مۇنداي كەشەن ساۋد ارابياسى، اقش، بەلگيا، وڭتۇستىك كورەيا جانە جۇڭگو سەكىلدى 5 ەلدە عانا بار.