قاسىم-جومارت توقايەۆ پورتۋگاليا پرەزيدەنتى مارسەلۋ رەبەلۋ دە سوۋزامەن كەلىسسوز جۇرگىزدى.
مەملەكەتتەر باسشىلارى ەكى ەلدى دوستىق قاتىناستار مەن ءوزارا ءتيىمدى ىنتىماقتاستىق بايلانىستىراتىنىن اتاپ ءوتتى، دەپ حابارلايدى Almaty-akshamy.kz.
تاراپتار ينۆەستيسيا، سۋ رەسۋرستارىن باسقارۋ، تۋريزم جانە باسقا دا سالالارداعى جان-جاقتى قاتىناستاردى ودان ءارى ارتتىرۋ ءۇشىن زور الەۋەت بار ەكەنىن ايتتى. سيفرلاندىرۋ سالاسىنداعى ءوزارا ءىس-قيمىلدى نىعايتۋ ماسەلەلەرىنە ەرەكشە نازار اۋدارىلدى.
– ءسىزدىڭ ەلدىڭ IT سالاسىنداعى تاجىريبەسى مول. وسى باعىتتىڭ بولاشاعى زور ەكەنىن ەسكەرە وتىرىپ، مەن ليسسابونعا بىرلەسكەن جوبالاردى ىسكە اسىرۋ مۇمكىندىگىن زەردەلەۋ ءۇشىن ارنايى دەلەگاسيا جىبەرەمىن. قازاقستان پورتۋگاليالىق سەرىكتەستەرمەن تىعىز بايلانىس ورناتۋعا مۇددەلى، – دەدى قازاقستان پرەزيدەنتى.
سونىمەن قاتار تاراپتار حالىقارالىق كۇن تارتىبىندەگى وزەكتى ماسەلەلەردى تالقىلادى.
جاھاندىق ۇيىمدار اياسىندا، ەڭ الدىمەن، بۇۇ شەڭبەرىندە ءوزارا ءىس-قيمىلدى جالعاستىرۋ تۋرالى ۋاعدالاستىققا قول جەتكىزىلدى.
مۇنان كەيىن، مەملەكەت باسشىسى موڭعوليا پرەزيدەنتى ۋحنااگيين حۋرەلسۋحپەن كەلىسسوز جۇرگىزدى. قاسىم-جومارت توقايەۆ قازاقستان مەن موڭعوليا اراسىنداعى تىعىز ءارى ءداستۇرلى دوستىق قارىم-قاتىناستى اتاپ ءوتتى.
پرەزيدەنت ەكىجاقتى بايلانىستاردى ستراتەگيالىق سەرىكتەستىك دەڭگەيىنە دەيىن كەڭەيتۋ مۇمكىندىگىنە نازار اۋداردى.
مەملەكەت باسشىسى ساۋدا-ەكونوميكالىق ىقپالداستىققا تىڭ سەرپىن بەرۋ ءۇشىن ۇكىمەتارالىق كوميسسيانىڭ جۇمىسىن جانداندىرىپ، قازاقستان مەن موڭعوليانىڭ ىسكەرلىك كەڭەسىن قۇرۋ قاجەت ەكەنىن ايتتى. كەزدەسۋ سوڭىندا پرەزيدەنتتەر جاقىن ارادا ءبىر-بىرىنىڭ ەلىنە ساپارمەن بارۋ مۇمكىندىگىن تالقىلادى.
ال كەنيا رەسپۋبليكاسىنىڭ پرەزيدەنتى ۋيليام رۋتومەن كەزدەسۋى بارىسىندا كەنيامەن ساۋدا-ەكونوميكالىق قاتىناستاردى كەڭەيتۋ ماسەلەلەرى تالقىلاندى. پرەزيدەنت كەنيانى افريكا قۇرلىعىنداعى قارقىندى دامىپ كەلە جاتقان ەلدەردىڭ ءبىرى رەتىندە اتاپ ءوتىپ، ءوزارا ىنتىماقتاستىقتى دامىتۋعا ەرەكشە قىزىعۋشىلىق تۋعىزاتىن مەملەكەت ەكەنىن جەتكىزدى.
– مەن كەنيانىڭ دامۋ بارىسىن، ەكونوميكالىق جانە سىرتقى ساياساتىن قاداعالاپ وتىرامىن. سونداي-اق قازاقستان مەن كەنيا اراسىنداعى ىنتىماقتاستىقتى جاڭا دەڭگەيگە كوتەرۋ ءۇشىن بىرلەسە ارەكەت ەتۋگە دايىنمىن، – دەدى قاسىم-جومارت توقايەۆ.
ءوز كەزەگىندە ۋيليام رۋتو قازاقستاندىق كومپانيالاردى كەنيا ەكونوميكاسىنا بەلسەندى تۇردە ينۆەستيسيا قۇيۋعا، سونىڭ ىشىندە استىق تەرمينالىن سالۋ ارقىلى مومباسا پورتىن كەڭەيتۋ مۇمكىندىگىن قاراستىرۋعا شاقىردى. مەملەكەت باسشىسى ءوزارا ىنتىماقتاستىقتى نىعايتۋدىڭ مۇمكىندىكتەرىن زەرتتەۋ ءۇشىن كەنياعا ساۋدا ميسسياسىن جىبەرۋگە نيەتتى ەكەنىن ايتتى. پرەزيدەنت افريكا مەملەكەتتەرىمەن ەكىجاقتى دەڭگەيدە جانە كوپجاقتى بىرلەستىكتەر اياسىندا، ەڭ الدىمەن بۇۇ شەڭبەرىندە ءوزارا بايلانىستى دامىتۋدىڭ ماڭىزدىلىعىن اتاپ ءوتتى. مەملەكەت باسشىسى ۋيليام رۋتونى كەلەسى جىلى قازاقستانعا ساپارمەن كەلۋگە جانە استانا حالىقارالىق فورۋمىنا قاتىسۋعا شاقىردى.
قازاق-كورەي ستراتەگيالىق سەرىكتەستىگىن ودان ءارى دامىتۋ پەرسپەكتيۆالارى كورەيا رەسپۋبليكاسىنىڭ پرەزيدەنتى يۋن سوك ولمەن كەزدەسۋى بارىسىندا تالقىلادى. قاسىم-جومارت توقايەۆ قازاقستان مەن وڭتۇستىك كورەيا اراسىندا دوستىق قارىم-قاتىناستار ورناعانىن جانە قارقىندى دامىپ كەلە جاتقان ەكونوميكالىق بايلانىستاردىڭ ماڭىزى زور ەكەنىن اتاپ ءوتتى. قازاقستان پرەزيدەنتى ەكىجاقتى تاۋار اينالىمى بىلتىر 6 ميلليارد دوللاردان اسىپ، تۇراقتى ءوسىم بايقالىپ وتىرعانىن ايتتى. سونىمەن قاتار كورەي كومپانيالارىنىڭ قازاقستان ەكونوميكاسىنا سالعان ينۆەستيسيالارىنىڭ جالپى كولەمى 8 ميلليارد دوللاردان اسىپ، ەلىمىزدەگى ەڭ ءىرى 10 ينۆەستوردىڭ قاتارىندا نىق تۇرعانىن جەتكىزدى.
مەملەكەت باسشىسىنىڭ ايتۋىنشا، بۇگىندە قازاقستاندا 700-دەن استام كورەيالىق كومپانيا مەن بىرلەسكەن كاسىپورىن جۇمىس ىستەيدى. مىسالى، ەلىمىزدىڭ نارىعىندا KIA، Hyundai، Samsung، LG جانە باسقا دا كومپانيالار بەلسەندى قىزمەت ەتىپ جاتقانىن ايتۋعا بولادى. كەزدەسۋ بارىسىندا قاسىم-جومارت توقايەۆ سيرەك مەتالدار ءوندىرىسىن، اتوم ەنەرگەتيكاسىن دامىتۋ سالالارىنداعى ەكونوميكالىق ىنتىماقتاستىقتىڭ پەرسپەكتيۆتى باعىتتارىنا توقتالدى.
كورەيا پرەزيدەنتى يۋن سوك ءول قازاقستانمەن ءوزارا ءتيىمدى ىنتىماقتاستىقتى ودان ءارى تەرەڭدەتۋگە مۇددەلى ەكەنىن جەتكىزدى. ونىڭ ايتۋىنشا، كورەيالىق كومپانيالار ماشينا جاساۋ، تاۋ-كەن ونەركاسىبى، اتوم ەنەرگەتيكاسى سالالارى بويىنشا جۇزەگە اسىرىلىپ جاتقان جوبالاردى كەڭەيتۋگە جانە جاڭا جوبالاردى قولعا الۋعا ەرەكشە قىزىعۋشىلىق تانىتادى.
