الماتى قالا كۇنىنە قالاي بەزەندىرىلدى
وتكەن دەمالىس كۇندەرى الماتىدا قالا كۇنىن تويلاندى. قىركۇيەك ايىندا قالادا ءتۇرلى كونسەرتتەر، فەستيۆالدار مەن سپورتتىق ءىس-شارالار ۇيىمداستىرىلدى.
كونسەرتتىك ءىس-شارالاردان باسقا، قالامىزدىڭ تۋعان كۇنىنە قالاي وزگەرگەنىن بايقاۋعا بولادى. الماتىلىق سۋرەتشىلەر مەن ديزاينەرلەردىڭ شىعارماشىلىعىنىڭ ارقاسىندا الماتى تۋعان كۇنىندە ەرەكشە مەرەكەلىك كەيىپكە ەنىپ، جارقىراي ءتۇستى.
رەسپۋبليكا سارايىنىڭ الدىنداعى الاڭدى ەرەكشە اتاۋعا بولادى، وندا ءاربىر تۇرعىن مەن قوناق وتكەن زامانعا بارىپ، بۇرىنعى الماتىنىڭ اتموسفەراسىن سەزىنە الادى. مۇندا ءسىز گيننەستىڭ رەكوردتار كىتابىنا ەنگەن الەمدەگى ەڭ ۇلكەن رۋبيك تەكشەلەرىنىڭ موزايكاسىن، قىزىل الا ءسۇت بيدونىن جانە وتكەن زاماننىڭ كوپتەگەن باسقا زاتىن كورە الاسىز.
پانفيلوۆ كوشەسىنىڭ جاياۋ جۇرگىنشىلەر ايماعى دا ديزاين بويىنشا ەرەكشەلەندى. مۇندا «قىزعالداق قۇشاعى» ينستاللياسيا ورناتىلعان. مۇنداي بەزەندىرۋدىڭ اۆتورى - سۋرەتشى داريا موروز.
«باستاپقىدا بۇل جاي عانا سۋرەت بولدى، ءبىراق مەن ونى جانداندىرىپ، ينستاللياسياعا اينالدىرعىم كەلدى. ادەتتەگىدەي ءبارىن وتە قىسقا مەرزىمدە جاسادىق، ءساتتى شىقتى، سوعان قۋانىشتىمىز. الماتىعا ەرەكشە ءبىر نارسە جاساعىم كەلدى، ال «قىزعالداق قۇشاعى» ينستاللياسياسى ەلگەزەكتىك، دوستىق، تابيعات پەن مەگاپوليستىڭ ءوزارا بايلانىسى سىندى قالامىزدىڭ اتموسفەراسىن كورسەتەدى. قىزعالداق – تابيعاتتىڭ سيمۆولى، ال جارتىلاي شەڭبەر – بۇل ءاردايىم جىلۋلىقپەن جانە جايلىلىقپەن، ءۇي وشاعىمەن بايلانىستى كيىز ءۇي»، - دەيدى اۆتور.
پانفيلوۆ كوشەسىندە الماتىنىڭ پەيزاجدارى بار ۇلكەن المالاردى بايقاۋعا بولادى، ال كەيبىر ينستاللياسيالار وزىندىك ەرەكشەلىگىمەن تاڭ قالدىردى. سولاردىڭ ءبىرى ۇلكەن قىزعىلت قوراپتا بيبىگۇل ەسىمدى «باربي» ينستاللياسيا. تۋىندىنىڭ اۆتورىنا مۇنى وقىرمانى ايتقان. اۆتورى سۋرەتشى-يلليۋستراتور ميمي يلنيسكايا. ينستاللياسيانى پانفيلوۆ كوشەسىنەن قىركۇيەك ايىنىڭ سوڭىنا دەيىن كورۋگە بولادى.
«بۇل قۋىرشاق قازاقستاندا شىعارىلسا، قانداي بولاتىنىن قيالداعىم كەلدى. مەن كوشپەلى قۋىرشاق ويلاپ تاۋىپ، سۋرەتىمدى الەۋمەتتىك جەلىلەردە جاريالادىم. بۇل يدەيا ادامدارعا وتە ۇناپ، جاپپاي جازا باستادى. مەن قازاقستاندىق باربي وتە ەرەكشە بولۋى مۇمكىن ەكەنىن كورسەتۋ ءۇشىن باسقا سۋرەتتەردى سالا باستادىم. سونىڭ ناتيجەسىندە قالا كۇنىنە دەيىن ماعان مادەنيەت باسقارماسىنىڭ وكىلدەرى كەلىپ، تۋىندىمدى ينستاللياسياعا اينالدىرۋدى ۇسىندى»، - دەدى اۆتور.
ءميميدىڭ ايتۋىنشا، جاڭا قۋىرشاقتار تۇرعىنداردى قۋانتىپ، ينستاللياسياعا اينالۋى ءۇشىن قازاقتىڭ ءباربيىن شىعارۋ جالعاسادى.
Artbatfest كوشە ونەرى فەستيۆالى اياسىندا ايگىلى سۋرەتشى ساۋلە سۇلەيمەنوۆا ينستاللياسيانى سەللوفان كەسكىندەمەسى تۇرىندە ۇسىندى. اۆتوردىڭ ون ەكى مەترلىك ءمۇسىنىن اباي داڭعىلى مەن بايسەيىتوۆا كوشەسىنىڭ قيىلىسىنان كورۋگە بولادى. ساۋلە اتاپ وتكەندەي، ول پوەزيانى پلاستيك پاكەتتەن ىزدەيدى، سونىمەن قاتار زاتتاردى قايتالاما پايدالانۋ تاقىرىبىن كوتەرەدى. ونىڭ تۋىندىسى قالا ماتريساسىنا، مەگاپوليس پەن ونىڭ تۇرعىندارىنىڭ ءوزارا ارەكەتتەسۋىنە باعىتتالعان. لەرمونتوۆ اتىنداعى دراما تەاترىنا قاراما-قارسى ساكەن نارىنوۆتىڭ «ءومىر اعاشى» شىعارماسىن كورۋگە بولادى.
«قازىرگى زامانعى ونەر قالالىق ورتامەن ءوزارا بايلانىسۋى كەرەك. فەستيۆال قاتىسۋشىلارى مەگاپوليستى اشىق اسپان استىنداعى ۇلكەن مۋزەيگە اينالدىرادى، ونى كەز كەلگەن ادام تەگىن كورە الادى. ءبىزدىڭ جۇمىسىمىزدىڭ قالا كۇنىنە ارنالعان مەرەكەلىك بەزەندىرۋدىڭ ءبىر بولىگى بولعانى قۋانتادى»،-دەيدى Artbatfest فەستيۆالىنىڭ ارت-ديرەكتورى ۆلاديسلاۆ سلۋدسكيي.
Apple Fest فەستيۆالىندە تۇڭعىش پرەزيدەنت ساياباعىندا كوپتەگەن تاقىرىپتىق فوتوايماق مەن ينستاللياسيالار ورناتىلعان. ولاردىڭ ىشىندە المادان جاسالعان قازاقتىڭ ۇلتتىق ورنەكتەرىن اتاپ كورسەتۋگە بولادى. ۇيىمداستىرۋشىلاردىڭ ارقاسىندا ساياباق ۇلتتىق داستۇرلەردى بەينەلەيتىن ەرەكشە تۇردە كورىندى.
