پرەزيدەنت بالالارمەن جانە ولاردىڭ اتا-انالارىمەن اڭگىمەلەستى.
قازاقستان پرەزيدەنتى قاسىم-جومارت توقايەۆ انا مەن بالا ۇلتتىق عىلىمي ورتالىعىنا باردى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
قاسىم-جومارت توقايەۆ وسى ورتالىقتاعى سمارت سىنىپتىڭ جۇمىسىمەن تانىستى. ەم الىپ جاتقان بالالار وقۋدان قول ءۇزىپ قالماۋى ءۇشىن «اقىلدى سىنىپ» ۇيىمداستىرىلعان. مۇندا مەكتەپ باعدارلاماسىنا سايكەس ماتەماتيكا، تاريح جانە باسقا دا پاندەر وقىتىلادى. سونداي-اق مۋزىكانىڭ جانە ەرتەگىلەردىڭ كومەگىمەن تەراپيا ساباقتارى، ءتۇرلى شىعارماشىلىق ويىندار مەن شاحمات ۇيىرمەسى قاراستىرىلعان.
پرەزيدەنت رەسپۋبليكانىڭ ءار وڭىرىنەن كەلىپ، ەم الىپ جاتقان بالالارمەن جانە ولاردىڭ اتا-انالارىمەن اڭگىمەلەستى. مەملەكەت باسشىسى جەتكىنشەكتەردىڭ تەزىرەك ساۋىعىپ كەتۋىنە تىلەكتەستىك ءبىلدىردى. قاسىم-جومارت توقايەۆ بالالار جىلىنىڭ اياسىندا ءبىلىم، دەنساۋلىق ساقتاۋ، سپورت جانە باسقا دا سالالاردا جەتكىنشەكتەرگە كوڭىل بولىنگەنىن ايتىپ، بۇدان ءارى دە قولداۋ شارالارى جالعاساتىنىن جەتكىزدى.
پرەزيدەنتكە بالالار بولىمشەلەرىندە 351 بالا ەم الىپ جاتقانى تۋرالى باياندالدى. بيىل بۇل جەردە 18 مىڭعا جۋىق بالا ەمدەلگەن. كەيىنگى ءۇش جىلدا انا مەن بالا ۇلتتىق عىلىمي ورتالىعىنا 30-دان استام جاڭا مەديسينا تەحنولوگياسى ەنگىزىلىپ، ماماندارى شەتەلدە بىلىكتىلىگىن جەتىلدىرگەن.
كەزدەسۋ سوڭىندا پرەزيدەنت بالالاردى جاڭا جىل مەرەكەسىمەن قۇتتىقتاپ، بارلىعىنا سىيلىق ۇلەستىردى.