الماتىدا مامانداندىرىلعان بالالار ۇيىندە جاڭاجىلدىق ەرتەڭگىلىك ءوتتى

الماتىدا بالالارعا ارنالعان شىرشا تويلارى ءوتىپ جاتىر.

قالاداعى مامانداندىرىلعان بالالار ۇيىندە جاڭاجىلدىق قويىلىم ءوتتى. بۇلدىرشىندەردى الماتى اكىمىنىڭ ورىنباسارى اسەم ءنۇسىپوۆا قۇتتىقتادى، دەپ حابارلايدى Almaty-akshamy.kz Almaty.tv سىلتەمە جاساپ.

پرەزيدەنتتىڭ تاپسىرماسىنا سايكەس، بالالاردى جاڭا جىلمەن قۇتتىقتاۋعا ەرەكشە كوڭىل ءبولىندى. بيىل الماتىدا ءداستۇرلى تۇردە مەكتەپتەردە، الەۋمەتتىك ورتالىقتاردا، بالالارعا بەيىمدەۋ جانە كومەك كورسەتۋ ورتالىقتارىندا بالالارعا ارنالعان شىرشالار، سونداي-اق ءحاوت ساناتىنداعى بالالار مەن مۇمكىندىگى شەكتەۋلى بالالارعا ارنالعان شىرشا تويلار وتكىزىلدى.

بالعىنداردى مەرەكەمەن قۇتتىقتىقتاۋعا قالا اكىمىنىڭ ورىنباسارى اسەم ءنۇسىپوۆا ارنايى كەلىپ، سىيلىق تابىستادى. الەۋمەتتىك مەكەمەدە 4 جاسقا دەيىنگى 38 بالا تۇرادى. ولاردىڭ اراسىندا مۇمكىندىگى شەكتەۋلى بۇلدىرشىندەر مەن تۇرمىسى ناشار وتباسىنان شىققاندار دا بار. بالعىندارعا مەملەكەت تاراپىنان قولداۋ كورسەتىلىپ كەلەدى.

«ءبىزدىڭ بالالارىمىز تاۋلىك بويى وسىندا بولادى. ولارمەن تاربيەشىلەر، دارىگەرلەر، لوگوپەدتەر جۇمىس ىستەيدى. مەديسينالىق قىزمەت كورسەتۋ مەن دەنساۋلىعىن وڭالتۋ جۇمىسى دا جۇرگىزىلەدى»، – دەدى مامانداندىرىلعان بالالار ءۇيىنىڭ باس دارىگەرى ناتاليا نەمتينا.