پرەزيدەنت اكىمگە ءبىرقاتار مىندەت جۇكتەدى.
پرەزيدەنت قاسىم-جومارت توقايەۆقا وبلىستىڭ قازىرگى الەۋمەتتىك-ەكونوميكالىق جاعدايى مەن دامۋ پەرسپەكتيۆالارى جونىندە باياندالدى، دەپ حابارلايدى Almaty-akshamy.kz اقورداعا سىلتەمە جاساپ.
مارات سۇلتانعازييەۆتىڭ ايتۋىنشا، قازىرگى كەزەڭدە وبلىستىڭ ەكونوميكاسىندا وڭ وزگەرىستەر بايقالادى. اتاپ ايتقاندا، اۋىل شارۋاشىلىعى سالاسىنىڭ دامۋ كورسەتكىشى – 102،8، وڭدەۋ ونەركاسىبىنىڭ ءوسىمى – 105،2، ساۋدا – 103، قۇرىلىس –114،3 پايىزعا ارتقان. وبلىس اكىمدىگى جىل سوڭىنا دەيىن وسى قارقىندى ساقتاپ قالۋعا نيەتتى.
پرەزيدەنت ازاماتتاردىڭ سەنىمىن اقتاۋ، سونداي-اق وبلىس تۇرعىندارىنىڭ تۇرمىس ساپاسىن جاقسارتۋ ءۇشىن ناقتى شارالار قابىلداۋ ماڭىزدى ەكەنىن ايتتى.
مەملەكەت باسشىسىنا اكىمشىلىك-اۋماقتىق رەفورمالاردان كەيىنگى جاڭا مۇمكىندىكتەردى ەسكەرە وتىرىپ، الماتى وبلىسى مەن قونايەۆ قالاسىنىڭ الەۋمەتتىك-ەكونوميكالىق دامۋ جوسپارىنا وزگەرىستەر ەنگىزىلەتىنى جونىندە اقپارات بەرىلدى. اكىمنىڭ ايتۋىنشا، قۇرىلىس، ونەركاسىپ، اۋىل شارۋاشىلىعى، وڭدەۋ ونەركاسىبى، ساۋدا جانە تۋريزم سياقتى ەكونوميكانىڭ ينۆەستيسيالىق تارتىمدى سەكتورلارىنا ەرەكشە كوڭىل بولىنەدى.
مارات سۇلتانعازييەۆ قاسىم-جومارت توقايەۆقا وبلىس ورتالىعىن قونايەۆ قالاسىنا كوشىرۋ جۇمىستارى جونىندە باياندادى. سونداي-اق جەرگىلىكتى اتقارۋشى ورگاندار مەن مەملەكەتتىك مەكەمە قىزمەتكەرلەرى ءۇشىن قاجەتتى جاعداي جاساۋعا باعىتتالعان كەشەندى شارالار جونىندە ەسەپ بەرىلدى.
پرەزيدەنت جاڭا اكىمگە وبلىس تۇرعىندارىنىڭ تۇرمىس ساپاسىن ارتتىرۋعا، تۇرعىن ۇي-كوممۋنالدىق شارۋاشىلىعىنا، ءۇش اۋىسىمدىق مەكتەپتەرگە، يرريگاسيالىق جۇيەلەردى جاڭارتۋعا، مەديسينا جانە قوعامدىق كولىك ماسەلەلەرىن شەشۋگە قاتىستى ءبىرقاتار مىندەت جۇكتەدى.