ەندى ەڭ تومەنگى كومەك 37 389 تەڭگە بولادى.
بۇل تۋرالى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى دۋلات جەكەبايەۆ مالىمدەدى، دەپ حابارلايدى Almaty-akshamy.kz
«بۇعان دەيىن ارنايى ساناتتاعى بالالاردى مەكتەپكە دايىنداۋ ءۇشىن مەملەكەت ەسەبىنەن بولىنەتىن قاراجات مولشەرى 17-40 مىڭ تەڭگە ارالىعىندا بولاتىن. تاياۋدا بۇل نورماعا مينيسترلىك ۇسىنىسى بويىنشا وزگەرىستەر ەنگىزىلدى. ەندى ەڭ تومەنگى كومەك - 37 389 تەڭگە بولادى. سونداي-اق، جەرگىلىكتى اتقارۋشى ورگانداردىڭ ۇسىنىسىمەن كومەك كورسەتۋ تەتىگىنە وزگەرىستەر ەنگىزىلدى. ەندى اقشا اتا-انالاردىڭ شوتىنا تىكەلەي اۋدارىلادى. بۇعان دەيىن قاجەتتى زاتتاردى اكىمدىكتەر ساتىپ الاتىن. سوندىقتان دا تاۋاردىڭ كولەمىنە، ساپاسىنا بايلانىستى ماسەلەلەر تۋىندايتىن»، - دەدى دۋلات جەكەبايەۆ.
بيىل ماتەريالدىق كومەك اتاۋلى الەۋمەتتىك كومەك الاتىن وتباسىلاردىڭ بالالارىنا، ااك المايتىن، ءبىراق ورتاشا تابىسى كۇنكورىس دەڭگەيىنەن تومەن وتباسىلاردىڭ بالالارىنا بەرىلەدى.
نەگىزگى قولداۋ شارالارىن اكىمدىكتەر جۇزەگە اسىراتىندىقتان، بيىل ولار قارجىلاي كومەك الاتىن بارلىق بالاعا 37 389 تەڭگە كولەمىندە قاراجات بولەدى. بۇگىنگى تاڭدا بۇل سومادان دا ارتىق قارجى بولەتىن جەرگىلىكتى اتقارۋشى ورگاندار بار.