وقۋ-اعارتۋ ءمينيسترى مەكتەپتەردەگى جاڭا جىلدى اتاپ ءوتۋ تۋرالى پىكىر ءبىلدىردى، دەپ حابارلايدى aqshamnews.kz
عاني بەيسەمبايەۆ مەكتەپتەردە جاڭا جىلدى تويلاۋ قارجىلىق جيناۋلار مەن قىمبات ءىس-شارالارسىز ءوتۋى كەرەكتىگىن ەسكە سالدى. بۇل تالاپ تەك ءبىتىرۋ كەشتەرىنە عانا ەمەس، باسقا دا شارالارعا، ونىڭ ىشىندە جاڭا جىلدىق شىرشا مەرەكەلەرىنە دە قاتىستى.
«بۇعان دەيىن ايتقانىمىزداي، تاعى دا قايتالاپ وتەمىن: مەكتەپتەردە ەشقانداي قارجى جيناۋ بولماۋى كەرەك. بۇل مينيسترلىك بۇيرىعىمەن تىيىم سالىنعان»، – دەپ اتاپ ءوتتى مينيستر.
بەيسەمبايەۆتىڭ ايتۋىنشا، مەرەكەلىك ءىس-شارالاردى اتا-انالاردىڭ قارجىلىق قاتىسۋىنسىز-اق ۇيىمداستىرۋعا بولادى.
«كەز كەلگەن ءىس-شارا جاستاردىڭ تاربيەسىنە باعىتتالۋى ءتيىس، جاي عانا كوڭىل كوتەرۋ ەمەس»، – دەپ قوستى ول.
مينيستر مۇعالىمدەرگە سىيلىق بەرۋ ماسەلەسىنە دە توقتالدى:
«مۇعالىمدەر ەشقانداي سىيلىق كۇتپەيدى دەپ سەنىممەن ايتا الامىن. ءبىز، ۇستازدار، بالالاردى وقىتىپ، تاربيەلەۋدى ماتەريالدىق ماراپات كۇتپەستەن ورىندايمىز. ەگەر كەيبىر ءبىلىم بەرۋ ۇيىمدارىندا مۇنداي ارەكەتتەرگە جول بەرىلىپ جاتسا، حابارلاڭىزدار – ءتيىستى شارالار قولدانامىز»، – دەدى بەيسەمبايەۆ.
مينيستر مەرەكەلەردە، مىسالى، مۇعالىمدەر كۇنى سياقتى جاعدايلاردا گۇل سىيلاۋعا رۇقسات ەتىلگەنىن، ءبىراق مەكتەپتىڭ باستى ماقساتى ساپالى ءبىلىم بەرۋ مەن تاربيە ەكەنىن ەرەكشە اتاپ ءوتتى.