بۇگىندە وسى اتاۋمەن ەلىمىزدە وڭىرلەردەگى شاعىن جوبالاردى قامتيتىن «اۋىل مەكتەبى – ساپا الاڭى» جوباسى جۇزەگە اسۋدا.
ق ر ۇكىمەتىنىڭ وتىرىسىندا وقۋ-اعارتۋ ءمينيسترى عاني بەيسەمبايەۆ اۋىل مەكتەپتەرىندە ءبىلىم ساپاسىن كوتەرۋ ماقساتىنىدا قولعا الىنعان شارالارعا توقتالىپ ءوتتى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
وتكەن جىلى اقتوبە وبلىسىندا وقۋ-اعارتۋ مينيسترلىگىنىڭ، «قازاقستان حالقىنا» قوعامدىق قورىنىڭ جانە ءبىلىم بەرۋدى تۇراقتى دامىتۋ قولداۋىمەن سيفرلىق تەحنولوگيالاردى پايدالانا وتىرىپ، اۋىل مەكتەپتەرىنىڭ الەۋەتىن ارتتىرۋ جونىندەگى جوبا تابىستى جۇزەگە اسىرىلدى. جوباعا 12 تىرەك جانە 134 شاعىن جيناقتى مەكتەپ، 11 مىڭنان استام ءبىلىم الۋشى مەن 3،5 مىڭعا جۋىق پەداگوگ قاتىستى.
جوباعا قاتىسقان مەكتەپ باسشىلارى مەن پەداگوگتەرى سيفرلىق قۇزىرەتتىلىك پەن كاسىبي دامۋعا باعىتتالعان ارنايى كۋرستاردان ءوتتى. شاعىن جيناقتى مەكتەپتەردىڭ تەحنيكالىق مۇمكىندىكتەرىنە قاراي وقىتۋدىڭ 4 مودەلى ازىرلەنىپ ەنگىزىلدى.
«جوبا اياسىندا تىرەك مەكتەپتەرىنىڭ ماتەريالدىق-تەحنيكالىق بازاسى تولىعىمەن جاڭارتىلىپ، شاعىن جيناقتى مەكتەپتەر پاندىك جانە سيفرلىق كابينەتتەرمەن جابدىقتالدى. مەكتەپتەر جىلدامدىعى جوعارى ينتەرنەتپەن قامتاماسىز ەتىلدى»، - دەپ مالىمدەدى عاني بەيسەمبايەۆ.
سونداي-اق وتكەن وقۋ جىلى الماتى وبلىسىنىڭ 50 مەكتەبىندە جاراتىلىستانۋ-ماتەماتيكالىق باعىتتاعى پاندەر بويىنشا ءبىلىم ساپاسىن ارتتىرۋ ماقساتىندا «ءبىلىم-يننوۆاسيا» ليسەيلەرىنىڭ تاجىريبەسىنە نەگىزدەلگەن جوبا جۇزەگە اسىرىلدى، ال بيىلعى جىلى ماڭعىستاۋ وبلىسىندا «وتپان» جوباسى باستالدى. جوبا 50 مەكتەپتى قامتيدى، ونىڭ ىشىندە 35 مەكتەپ اۋىلدىق جەرلەردە ورنالاسقان. وعان بارلىعى 60 مىڭ ءبىلىم الۋشى مەن 7 مىڭ پەداگوگ قاتىستى.
ەستەرىڭىزگە سالا كەتەيىك، قازاقستاندا بۇگىندە 8 مىڭ مەكتەپ بار، ونىڭ 67% اۋىل مەكتەپتەرى، 51% شاعىن جيناقتى مەكتەپتەر. شاعىن جيناقتى مەكتەپتەردىڭ ەڭ كوپ سانى سولتۇستىك قازاقستان، قوستاناي، اقمولا، پاۆلودار، باتىس قازاقستان جانە اقتوبە وبلىستارىندا ورنالاسقان.