بۇل - وقۋ-اعارتۋ ءمينيسترىنىڭ ءسوزى.
ايماعامبەتوۆ ىشكى ىستەر ورگاندارىنان وقۋ جىلىنىڭ باسىندا مەكتەپ جانىنداعى كەزەكشىلىكتى كۇشەيتىپ، قاجەت جەرلەرگە ارنايى جول بەلگىلەرىن قويۋدى سۇرادى، دەپ حابارلايدى Almaty-akshamy.kz
وقۋ-اعارتۋ ءمينيسترى اسحات ايماعامبەتوۆ پەن ىشكى ىستەر ءمينيسترى مارات احمەتجانوۆ جاڭا وقۋ جىلى قارساڭىندا وقۋشىلاردىڭ قاۋىپسىزدىگى ماسەلەلەرى بويىنشا كەڭەس وتكىزدى.
ايماعامبەتوۆتىڭ ايتۋىنشا، جەرگىلىكتى اتقارۋشى ورگاندار مەكتەپتەر بەينەكامەرامەن 100% قامتىلعانى تۋرالى ەسەپ بەرەدى، ءبىراق تەكسەرە كەلگەندە، ەلەۋلى كەمشىلىكتەر انىقتالىپ جاتادى. كامەرالاردىڭ ءبارى بىردەي جۇمىس ىستەمەيدى، قالا مەكتەپتەرىنىڭ ءبىر بولىگى جەدەل باسقارۋ ورتالىعىنا قوسىلماعان. مينيستر كامەرالاردىڭ سانى ەمەس، وسى كامەرالاردىڭ قانشا بالانى قامتيتىنى ماڭىزدى ەكەنىنە باسا نازار اۋداردى.
وقۋ-اعارتۋ مينيسترلىگى جاڭا وقۋ جىلى قارساڭىندا ىشكى ىستەر مينيسترلىگى وكىلدەرىمەن بىرلەسىپ، وقۋشىلاردىڭ قاۋىپسىزدىگىنە قاتىستى ساباقتار وتكىزەدى.
«قىركۇيەكتىڭ باسىنان باستاپ 5 مىڭنان استام پوليسيا قىزمەتكەرى مەكتەپتەرگە بارىپ، پروفيلاكتيكالىق ساباقتاردى بىرلەسىپ وتكىزەدى. بۇعان مۇعالىمدەر، ديرەكتوردىڭ ورىنباسارلارى جانە ديرەكتورلار بەلسەنە قاتىسادى. وقۋ جىلىنىڭ باسىندا ىشكى ىستەر ورگاندارىنان مەكتەپ جانىنداعى كەزەكشىلىكتى كۇشەيتىپ، قاجەت جەرلەرگە ارنايى جول بەلگىلەرىن قويىپ، الدىن الۋ شارالارىن جۇرگىزۋدى سۇرايمىز. بارلىق مەكتەپ اۆتوبۋستارىن، سونداي-اق قاۋىپسىزدىك جۇيەلەرىن تەكسەرۋدى اياقتاۋ قاجەت. بۇل جۇمىستى بىرلەسىپ اتقارامىز دەپ ويلايمىن»، - دەدى ايماعامبەتوۆ.
سونداي-اق ول كاسىبي كۇزەت اگەنتتىكتەرى مەكتەپتەردىڭ ەرەكشەلىكتەرىن ءبىلۋى قاجەت ەكەنىن ايتتى. ونىمەن قوسا، تاجىريبەلى قىزمەتكەرلەردىڭ ءجيى اۋىسپاعانىن، مەكتەپتىڭ ەرەكشەلىكتەرىن ءبىلۋى ءۇشىن ولاردى تۇراقتى جۇمىسپەن قامتاماسىز ەتۋ كەرەگىنە توقتالدى.
«ءبىز بۇل ماسەلەلەردى جۇمىس تارتىبىندە شەشۋدى ۇسىنامىز جانە ءبىلىم بەرۋ ۇيىمدارىمەن جۇمىس ىستەيتىن ليسەنزياسى بار كۇزەت ۇيىمدارىنا قويىلاتىن قازىرگى تالاپتارعا جەكە تارماق ەنگىزدىك»، - دەدى ايماعامبەتوۆ.
ىشكى ىستەر ءمينيسترى مارات احمەتجانوۆ ۆەدومستۆونىڭ بارلىق جەكە قۇرامى وقۋشىلار اراسىندا ءتۇسىندىرۋ جۇمىستارىن جۇرگىزەتىنىن مالىمدەدى. وقۋشىلارعا ولاردىڭ قۇقىقتارى مەن مىندەتتەرى ءتۇسىندىرىلىپ، قۇقىقبۇزۋشىلىقتىڭ الدىن الۋ، توتەنشە جاعدايلاردا قالاي ارەكەت ەتۋ كەرەگى ايتىلادى. ءىىم باسشىسى ەلوردالىق گيمنازيالاردىڭ بىرىنە ءوزى دە باراتىنىن اتاپ ءوتتى.
ءىىم باسشىسى اكىمدىكتەر ورتالىق مەمورگاندارمەن بىرلەسىپ، مەكتەپتەردەگى ءتارتىپتى قامتاماسىز ەتۋ جۇمىستارىن كۇشەيتۋى قاجەت ەكەنىن ايتتى.
وتىرىس قورىتىندىسى بويىنشا ءبىلىم بەرۋ ۇيىمدارى مەن قۇقىق قورعاۋ ورگاندارىنىڭ باسشىلارىنا ءتيىستى تاپسىرمالار بەرىلدى.