مەكتەپ ديرەكتورلارىنىڭ جەتىسپەۋشىلىگى ءۇش ەسە قىسقاردى: عاني بەيسەمبايەۆ ولاردى تامىز ايىندا تولىق تاعايىنداۋدى تاپسىردى
وقۋ-اعارتۋ ءمينيسترىنىڭ توراعالىعىمەن وبلىس اكىمدەرىنىڭ ورىنباسارلارىمەن وتكەن كەڭەستە مەكتەپ ديرەكتورلارىن بوس لاۋازىمدارعا تاعايىنداۋ ماسەلەسى قارالدى.
2023 جىلدان باستاپ مەملەكەت باسشىسىنىڭ تاپسىرماسى بويىنشا ق ر وقۋ-اعارتۋ مينيسترلىگى مەكتەپتەردە باسقارۋشىلاردىڭ جاڭا بۋىنىن قالىپتاستىرۋعا باعىتتالعان «ءبىلىم بەرۋدەگى وزگەرىستەردىڭ 1000 كوشباسشىسى» ستراتەگيالىق جوباسىن ىسكە اسىرىپ كەلەدى. ەكى جىل ىشىندە ىرىكتەۋدىڭ بارلىق كەزەڭدەرىنەن ءساتتى وتكەن 583 كانديدات رەسپۋبليكالىق كادر رەزەرۆىنىڭ قۇرامىنا ەندى. 2025 جىلى تاعى 400 ۇمىتكەر وقۋدان وتۋدە.
جوبانى ىسكە اسىرۋ بارىسىندا مەكتەپ ديرەكتورلارىنىڭ تاپشىلىعى ءۇش ەسەگە قىسقاردى. وڭىرلەردىڭ باسىم بولىگى باسقارۋشى لاۋازىمدارىنا ارنايى دايىندىقتان وتكەن مامانداردى تاعايىنداۋ ارقىلى كادرلىق رەزەرۆتىڭ مۇمكىندىكتەرىن ءتيىمدى پايدالانادى. ودان بولەك، 4 مىڭعا جۋىق ديرەكتور «ورلەۋ» باۇو-دا قىسقا مەرزىمدى كۋرستاردان ءوتتى، بۇل مەكتەپتەردەگى باسقارۋ الەۋەتىن نىعايتۋعا جانە ءبىلىم بەرۋ جۇيەسىندەگى مەنەدجمەنت ساپاسىن ارتتىرۋعا مۇمكىندىك بەرەدى.
«جوبا ايتارلىقتاي ناتيجە بەردى، مەكتەپتەردە جاڭاشىل، ىنتالى مەنەدجەرلەر پايدا بولادى. ەندى بۇل پروسەسس جۇيەلەپ، قالعان بارلىق بوس جۇمىس ورىندارعا باسقارۋشى كادرلاردى تاعايىنداۋدى تامىز ايىندا اياقتاۋ ماڭىزدى. بۇل – ديرەكتورلاردى تاعايىنداۋ عانا ەمەس، سونىمەن قاتار ءبىلىم بەرۋدەگى باسقارۋ مادەنيەتىن جۇيەلى تۇردە جاڭارتۋ. اتالعان باعىتتاعى جۇمىستار ناقتى وزگەرىستەر مەن ءبىلىم بەرۋ ساپاسىن ارتتىرۋعا مۇمكىندىك بەرەدى»، – دەدى عاني بەيسەمبايەۆ.
ءمينيستردىڭ ايتۋىنشا، ءبىرقاتار وڭىرلەردە كادر رەزەرۆىنىڭ الەۋەتى تولىق پايدالانىلماي وتىر. ماسەلەن، الماتى، قاراعاندى، اباي، پاۆلودار جانە تۇركىستان وبلىستارىندا باسقارۋشى كادرلارعا قاجەتتىلىك باسىم. مينيستر تامىز ايىندا قالعان بوس جۇمىس ورىندارىنا تاعايىنداۋدى اياقتاۋ تۋرالى تاپسىرمانىڭ ورىندالۋىنا وبلىستىق ءبىلىم باسقارمالارىنىڭ باسشىلارى دەربەس جاۋاپتى بولاتىنىن اتاپ ءوتتى.