ق ر پرەمەر-مينيسترىنىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەستە بالالار قاۋىپسىزدىگىن قامتاماسىز ەتۋ جانە بۋللينگكە قارسى شارالار جايى تالقىلاندى. وعان سالالىق مينيسترلىكتەر وكىلدەرى، وبلىس اكىمدەرىنىڭ جاۋاپتى ورىنباسارلارى جانە بالالار قۇقىعى جونىندەگى ۋاكىل قاتىستى.
ەلىمىزدە زورلىق-زومبىلىق جانە بۋللينگتەن جاپا شەككەندەرگە كومەك بەرۋ جونىندەگى كەشەندى باعدارلاما ازىرلەنىپ جاتىر. مۇددەلى مەملەكەتتىك ورگاندار، عالىمدار، قوعام بەلسەندىلەرى مەن ساراپشىلاردان تۇراتىن جۇمىس توبى بۇل باعىتتا ەلدە اتقارىلىپ جاتقان جۇمىستارمەن قاتار، حالىقارالىق تاجىريبەنى دە زەرتتەگەن.
بۋللينگكە ۇشىراعان نەمەسە كۋا بولعانداردى انىقتاۋ مەن ولارعا قولداۋ كورسەتۋ ادىستەمەسى قابىلدانعان. 111 ءنومىرى بويىنشا بايلانىس ورتالىعى جۇمىس ىستەۋدە. ادىستەمەگە سايكەس ماماندار قىسىم جاساعان تاراپپەن دە، بۋللينگكە ۇشىراعان جاقپەن دە جۇمىس جاسايدى. بۇدان بولەك «نازاربايەۆ زياتكەرلىك مەكتەپتەرىمەن» بىرلەستىكتە فينليانديادا وڭ ناتيجە كورسەتكەن KiVa باعدارلاماسىن پيلوتتىق رەجيمدە جۇزەگە اسىرۋ كوزدەلگەن.
«العاشقى كەزەڭدە ەلدە 100-دەن استام مەكتەپ تاڭدالىپ، ءتيىستى شارالار كەستەسى ازىرلەنگەن. ادىستەمە مازمۇنى بەيىمدەلىپ، ماماندار وقىتىلىپ جاتىر. پيلوت الداعى وقۋ جىلىنان باستاپ جۇزەگە اسىرىلاتىن بولادى. سىنىپ ساعاتتارىنىڭ تاقىرىپتارى بەلگىلەندى. ەگەر باعدارلاما ناتيجەلى بولسا، تاجىريبە وزگە ءبىلىم وشاقتارىنا تاراتىلاتىن بولادى»، — دەدى «نازاربايەۆ زياتكەرلىك مەكتەپتەرى» دببۇ باسقارما ءتوراعاسى ءانۋار جانعوزين.
بۋللينگكە قارسى شارالار اياسىندا وڭىرلىك پسيحولوگيالىق قولداۋ ورتالىقتارىنىڭ قاتارىن كوبەيتىپ، جۇمىسىن كۇشەيتۋ ماقساتى قويىلدى. كريزيستىك جاعدايدا دەمەۋ بولار مەكەمەلەر ەلدىڭ بارلىق ايماعىندا اشىلۋى كەرەك. وقۋ-اعارتۋ ۆيسە-مينيسترى ەدىل وسپان كەلتىرگەن دەرەككە ساي وبلىستار بۇل جۇمىستى ماۋسىم ايىنا دەيىن اياقتايدى. وسى رەتتە جەرگىلىكتى اكىمدىكتەرگە بەكىتىلگەن كەستەگە ساي ۇيىمداستىرۋ شارالارىن قولعا الىپ، ورتالىقتاردىڭ ءتيىستى جابدىقتالۋىن قاداعالاۋ تاپسىرىلدى.
«زورلىق-زومبىلىق پەن بۋللينگتەن جاپا شەككەندەرگە قولداۋ كورسەتۋ كابينەتتەرى مەن ورتالىقتاردىڭ جۇمىسى ماڭىزدى. KiVa باعدارلاماسىن پيلوتتىق رەجيمدە جۇزەگە اسىرۋ ءۇشىن قاجەتتى شارالاردى قولعا الۋدى تاپسىرامىن. وعان قاتىساتىن ءبىلىم وشاقتارىن تاڭداۋ كريتەرييلەرىن مۇقيات قاراستىرۋ قاجەت. بۇل جۇمىس ەكى اپتا ىشىندە اتقارىلۋى شارت. تاڭدالعان مەكتەپتەرمەن شەكتەلمەي، “نازاربايەۆ زياتكەرلىك مەكتەپتەرى” بازاسىندا ءتيىستى ۇستازداردى وقىتۋ جاعىن قاتار قاراستىرعان ءجون. بۇعان مۇددەلى مەملەكەتتىك ورگاندارمەن قاتار، وبلىس اكىمدىكتەرى بىرلەسە ارالاسۋى قاجەت»، — دەدى تامارا دۇيسەنوۆا.