ءبىلىم جانە عىلىم ءمينيسترى اسحات ايماعامبەتوۆتىڭ ايتۋىنشا، زەرتتەۋلەر مەن تالداۋلار ناتيجەسى 1-سىنىپ وقۋشىسىنا بىردەن ءۇش ءتىلدى مەڭگەرۋ قيىن ەكەنىن كورسەتكەن.
قازاقستاندا اعىلشىن ءتىلىن 1-سىنىپتان ەمەس، 3-سىنىپتان باستاپ وقىتۋ جوسپارلانىپ وتىر، دەپ حابارلايدى Almaty-akshamy.kz
«بۇل – ءتيىمسىز. ءبىز بۇل ماسەلەگە قاتىستى شەشىم قابىلدادىق. ەندى قازاق تىلىندە وقيتىن مەكتەپتەردە 1-سىنىپ وقۋشىسى ءبىر عانا ءتىلدى، ياعني قازاق ءتىلىن مەڭگەرەدى. ءبىز بالانىڭ الدىمەن ءوز انا تىلىندە وقۋدى جانە جازۋدى ۇيرەنۋى ءۇشىن ءتيىستى جۇمىس جۇرگىزىپ جاتىرمىز. ەكىنشى سىنىپتا باعدارلاماعا ورىس ءتىلى، ءۇشىنشى سىنىپتا اعىلشىن ءتىلى قوسىلادى»، - دەدى ايماعامبەتوۆ.
ال ورىس تىلىندە وقيتىن مەكتەپتەردە 1-سىنىپتا ورىس ءتىلى مەن مەملەكەتتىك ءتىل، ال 3-سىنىپتان باستاپ اعىلشىن ءتىلى بولادى.
«مۇنداي زەرتتەۋلەر مەن ۇسىنىستار بۇرىن دا بولعان، سول سەبەپتى ونى ەنگىزۋدى جوسپارلاپ وتىرمىز»، - دەدى مينيستر.